फाइल तस्बिर
इटहरी । सुनसरीको रामधुनी नगरपालिकामा धान ओसार्दै गरेको सिटीसफारी दुर्घटना हुँदा चालकको मृत्यु भएको छ ।
शनिबार साँझ ६:४५ बजेतिर रामधुनी-९ डुम्राहा टोलमा प्र१-०२-००४ह १४८१ नम्बरको सिटीसफारी दुर्घटना भएको हो ।
आफ्नै खेतबारीबाट धान ओसार्ने क्रममा सिटीसफारी आफैं अनियन्त्रित भई दुर्घटना हुँदा सिटी चालक ५० वर्षीय पुरण चौधरी घाइते भएका थिए ।
गम्भीर घाइते भएका उनलाई उपचारको लागि जिल्ला अस्पताल इनरुवा सुनसरी ल्याएको थियो । तर, डाक्टरले चेकजाँच गर्दा राति ७:१५ बजे मृत घोषित गरेका हुन् ।
दुर्घटनाबारे जिल्ला प्रहरी कार्यालय, सुनसरीबाट प्रहरी निरीक्षक पर्शुराम राईको कमाण्डमा रहेको प्रहरी टोलीले थप बुझ्ने काम गरिरहेको छ ।
