दमक । झापाको कमल गाउँपालिकाबाट ४० लाख बराबरको अमेरिकी डलरसहित एक जना पक्राउ परेका छन् ।
पक्राउ पर्नेमा झापाको गौरादह नगरपालिका वडा न.५ बस्ने २५ वर्षीय मोहम्मद नौसाद मिया रहेको इलाका प्रहरी कार्यालय दमकले जनाएको छ ।
बिहीबार दिउँसो २ बजेतिर इलाका प्रहरी कार्यालय दमकबाट प्रहरी नायब उपरीक्षक निशान थापाको कमाण्डमा खटिएको प्रहरी टोलीले उनलाई पक्राउ गरेको हो ।
कमल गाँउपालिका-३ केर्खा चोकस्थित पूर्व-पश्चिम राजमार्गमा सवारी साधन चेकजाँच गर्ने क्रममा दमकबाट बिर्तामोडतर्फ जाँदै गरेको प्रदेश १-०२-००१ ख ९५३० नम्बरको यात्रुबाहक बसलाई चेकजाँच गर्दा उनी पक्राउ परेका हुन् ।
सोही बसमा सवार रहेका उनको कालो झोला चेकजाच गर्दा स्रोत नखुलेको अमेरिकन डलर १०० दरका २९७ थान अर्थात् २९ हजार ७०० (आजको नेपाली दररेट १ डलरको १३५.८२ अनुसार रु.४० लाख ३३ हजार ८५४) फेला परेको थियो ।
यस विषयमा इलाका प्रहरी कार्यालय दमकबाट थप अनुसन्धान कार्य जारी रहेको छ ।
