रौतहट । बारा बरियारपुरस्थित प्रसिद्ध गढीमाई मन्दिरमा दर्शन गरेर फर्किरहेको स्कार्पियो रौतहटस्थित राजमार्गमा दुर्घटना हुँदा आठ जनाको मृत्यु भएको छ ।
पूर्व-पश्चिम राजमार्गअन्तर्गत रौतहटको चन्द्रपुर नगरपालिकास्थित धन्सार–लमाहा खोलाको नजिकै मंगलबार बिहान दर्शनार्थी चढेको बा १६ च ३१६२ नम्बरको स्कर्पियो दुर्घटना भएको थियो ।
उक्त दुर्घटनामा चालकसहित आठ जनाको मृत्यु भएको छ भने अरू पाँच जना घाइते भएका छन् । मृत्यु हुने र घाइते हुने सबैको पहिचान खुलेको हो ।
बारा बरियारपुरस्थित लागेको पञ्चवर्षीय गढीमाई मेला दर्शन गरी सिराहातर्फ फर्किरहेको उक्त स्कर्पियो अनियन्त्रित भई बाटोबाट तल दाहिनेतर्फको रूखमा ठोक्किएको थियो ।
जसमा सिराहा जिल्लाको अर्नामा गाउँपालिका-३ का गाडी चालक श्रीकुमार यादव, दर्शनार्थीहरू स्थानीय ६० वर्षीया लरुवती देवी महरा, ३० वर्षीया उर्मिला महरा, ५० वर्षीया रामकुमारी महरा, ५५ वर्षीया महगीदेवी महरा, ६२ वर्षीया फूलमन्तीदेवी महरा, ६० वर्षीया रामकुमारीदेवी महरा, ३० वर्षीया सकुन्तलादेवी महराको मृत्यु भएको हो ।
मृतकमध्ये चालकबाहेक सबै दलित चमार जातिका मानिस हुन् ।
घाइते हुनेहरूमा सोही ठाउँका उमेश महराकी श्रीमती वर्ष ३० की राधा महरा, उमेश महराको छोरा दुई वर्षीय आर्यन महरा, गणेश महराकी श्रीमती २५ वर्षीया देवकुमारी महरा, सात वर्षीय छोरा ऋतिक महरा र ६० वर्षीय कन्यादेवी महरा रहेका छन् ।
घाइतेहरूको चन्द्रनिाहपुरस्थित अस्पतालमा सामान्य उपचारपछि बिहान सवा ४ बजे एम्बुलेन्सबाट बयोधा अस्पताल वीरगञ्ज पठाइएको प्रहरीले जनाएको छ ।
