पोखरा । सहकारीको बचत रकम अपचलन गरेको आरोपमा हिरासतमा रहेका राष्ट्रिय स्वतन्त्र पार्टीका सभापति रवि लामिछानेले अदालतमा गुनासो गरेका छन् ।
अनुसन्धानका लागि हाल प्रहरी हिरासतमा रहेका पूर्वगृहमन्त्री लामिछानेले आइतबार न्यायाधीश हिमलाल बेल्बासेको इजलासमा गुनासो पोखेका हुन् ।
लामिछानेमाथि कास्की जिल्ला अदालतले आइतबार नै थप अनुसन्धानका लागि प्रहरीलाई थप ४ दिन म्याद दिएका थियो ।
अदालतमा उभ्याएका बखत बेल्बासेको इजलासमा लामिछानेले आफूलाई रातारात अपहरण शैलीमा पोखरा ल्याइएको गुनासो गरेका हुन् ।
आफ्नो परिवार, वकिल र पार्टीलाई समेत जानकारी नदिई आफूलाई रातारात अपहरण गरेको शैलीमा पोखरा ल्याएको उनले बताएका हुन् ।
आफ्नो स्वास्थ्य अवस्था सामान्य नभएको भनेर प्रहरीसमक्ष आग्रह गर्दा पनि आफूलाई महानिरीक्षकको दबाबमा आफूलाई राति नै पोखरा ल्याइएको उनको भनाई थियो ।
चितवन पुर्याएकै दिनदेखि आफूलाई सन्चो नभएको र भोलिपल्ट बिहान पनि टाउको दुखेको निको नभएकोले प्रहरीले दिएको औषधि खाएर दिनभर बयान दिएको उनले जिकिर गरेका छन् ।
गाह्रो हुँदा पनि बयानमा सहयोग गर्दिनँ नभनेको उनले बताएका छन् ।
राति अबेर सरकारी वकिलको कार्यालयबाट आफूलाई जिल्ला प्रहरी कार्यालय फर्काइएको र करिब दस बजेतिर आफू आराम गर्न गएको उनले न्यायाधीश समक्ष बयान दिएका छन् ।
तर, प्रहरी महानिरीक्षकले त्यहाँको एसपीलाई फोन गरेर ‘अहिल्यै लिएर जा …’ भनेर दबाब दिएको लामिछानेको दाबी छ ।
एसपीले यसरी लान मिल्दैन भन्दा पनि महानिरीक्षकले उनलाई गालीसमेत गरेको लामिछानेले बताएका छन् ।
आफूले पनि ‘मलाई गाह्रो भएको छ आराम गर्न दिनुस् । मलाई अस्पताल लगेर चेक गर्नुस्’ भनेर पटकपटक आग्रह गर्दा पनि प्रहरीले आफ्नो बिन्ती नसुनेको लामिछानेले बताएका छन् ।
भोलि बिहान ७ बजे नै एयरपोर्ट जान्छु भन्दा पनि नमानेको उनको भनाई छ ।
आफूलाई लिन आएका एक प्रहरीको मुखबाट मादक पदार्थको गन्ध समेत आएको लामिछानेले आरोप लगाएका छन् ।
पोखरा आएर स्वास्थ्य परीक्षण गर्दा आफ्नो प्रेसर १८०/९० पुगेको पाइएको पनि पनि उनले न्यायाधीशसमक्ष बताएका छन् ।
बिहानदेखि बेलुकासम्मको बयान र मिडिया ट्रायल भएकोमा पनि उनले गुनासो गरेका छन् ।
ठाउँठाउँमा उजुरी हाल्न लगाइएको र अदालतले म्याद थपेको थप्यै गरेकोमा पनि उनले असन्तुष्टि पोखेका छन् ।
लामिछानेलाई थप १३ दिन हिरासतमा राख्न प्रहरीले अनुमति मागेको थियो ।
तर अदालतले भने चार दिन मात्र उनको म्याद थप गरेको हो ।
