विराटनगर । मोरङको ग्रामथान गाउँपालिका अध्यक्षका लागि भएको उपनिर्वाचनमा नेकपा माओवादी केन्द्रका नमोनारायण माझी निर्वाचित भएका छन् ।
आइतबार भएको उपनिर्वाचनअनुसार ५४ वर्षीय माझीले ६९६९ मतसहित जित हात पार्दै ग्रामथान गाउँपालिका अध्यक्ष बनेका हुन् ।
उनका निकटतम् प्रतिद्वन्दी नेपाली कांग्रेसका बलराम सरदार थारूले ५३३३ मत ल्याए भने तेस्रो स्थानमा रहेको नेकपा एमालेका उम्मेदवार तुलसीराम विश्वासले ४१५९ मत पाए ।
यस्तै, राष्ट्रिय प्रजातन्त्र पार्टी (राप्रपा)का दिनेशकुमार थन्दारले ५५५ मत पाउँदा राष्ट्रिय स्वतन्त्र पार्टी (रास्वपा) का नवीनकुमार विश्वास खवासले ३७५ मत ल्याए ।
३० वैशाख २०७९ मा भएको चुनावमा निर्वाचित कांग्रेसका जयप्रकाश गच्छदारको मृत्यु भएपछि यहाँ आइतबार उपनिर्वाचन भएको हो ।
ग्रामथानमा जम्मा २६ हजार ४४ मतदाता रहेकोमा १८ हजार ५७८ मत खसेको थियो ।
पालिका अध्यक्ष बन्न विभिन्न राजनीतिक दलबाट १५ र एक जना स्वतन्त्र गरी १६ जनाको उम्मेदवारी परेको थियो ।
नेपाली कांग्रेसका बलराम सरकार थारू, एमालेका तुलसीराम विश्वास र माओवादीका नमोनारायण माझी, राष्ट्रिय स्वतन्त्र पार्टी (रास्वपा) का नवीनकुमार विश्वास खवास, राष्ट्रिय प्रजातन्त्र पार्टी (राप्रपा)का दिनेशकुमार थन्दार, जनता समाजवादी पार्टी (जसपा)का सुरेशकुमार राजवंशी, जनमत पार्टीका विनोदकुमार माझी, नेकपा एकीकृत समाजवादीका दिलबहादुर विश्वकर्मा र नागरिक उन्मुक्तिका बुद्धिचन विश्वास थारूले उम्मेदवारी दिएका थिए ।
यस्तै, नेपाल मजदुर किसान पार्टीका पर्शुराम विश्वास थारू र मंगोल नेसनल अर्गनाइजेसनका भरत राई, राष्ट्रिय प्रजातन्त्र पार्टी नेपालका राजु मुसहर, नेपाल समाजवादी पार्टीका धर्मेन्द्रकुमार चौधरी, समावेशी समाजवादी पार्टीका बोधनारायण माझी र स्वतन्त्र नमनारायण चौधरी थारूले पनि अध्यक्षमा उम्मेदवारी दिएका थिए ।
