बराहक्षेत्र । सुनसरीको बराहक्षेत्र नगरपालिकाका-१ स्थितमा रहेको प्रहरी चौकी बराहक्षेत्रको नव निर्मित भवनको समुद्घाटन भएको छ ।
कोशी प्रदेश प्रहरी प्रमुख प्रहरी नायव महानिरीक्षक चन्द्रकुवेर खापुङको प्रमुख आतिथ्यता तथा बराहक्षेत्र नगरपालिकाका उप-प्रमुख नन्दकुमारी सुनुवारको अध्यक्षतामा बुधबार नवनिर्मित भवनको शिलान्यास भएको हो ।
शिलालेख अनावरण गरी भवनको विधिवत रूपमा समुद्घाटन भएको हो ।
प्रदेश प्रहरी प्रमुख खापुङले नव निर्मित भवनको समुद्घाटन तथा निरीक्षणसमेत गरेका थिए ।
कार्यक्रमलाई सम्बोधन गर्दै उनले धरतीको पहिलो तीर्थस्थल बराहक्षेत्रमा प्रहरी चौकी बराहक्षेत्रको नव निर्मित भवन निर्माण सम्पन्न भई उद्घाटन भएकोमा निर्माण कार्यमा सहयोग पुर्याउने सबैलाई धन्यवाद दिए ।
आगामी दिनहरूमा जनस्तरमा प्रहरीले प्रदान गर्ने शान्ति-सुरक्षा तथा अपराध नियन्त्रण कार्यमा जनचाहनावमोजिमको प्रहरी सेवा प्रदान हुनेमा आफू विश्वस्त रहेको उनले बताए ।
उनले प्रहरी चौकीमा कार्यरत प्रहरी कर्मचारीहरूलाई नयाँ भवन प्राप्त भएसँगै आम नागरिकमा प्रहरीले प्रदान गर्ने सेवामा थप गुणस्तरसहितको प्रहरी सेवा प्रदान गर्न तथा भवनको सरसफाइ रेखदेख र संरक्षण नियमित रूपमा गर्नसमेत निर्देशन दिए ।
नव निर्मित भवनको उद्घाटन कार्यक्रममा कोशी प्रदेश प्रहरी कार्यालय विराटनगर भौतिक पूर्वाधार शाखाका प्रहरी उपरीक्षक आर्किटेक हरि डंगोलले भवन निर्माणसम्बन्धी प्रतिवेदन प्रस्तुत गरेका थिए ।
यसैगरी, जिल्ला प्रहरी कार्यालय सुनसरीका प्रमुख प्रहरी उपरीक्षक सुमनकुमार तिम्सिना तथा बराहक्षेत्र नगरपालिकाका उप-प्रमुख नन्दकुमारी सुनुवारले आ-आफ्नो मन्तव्य राखेका थिए ।
नेपाल सरकारको नियमित बजेट ३ करोड १९ लाख ४० हजार रुपैयाँको लागतमा अढाइतले सुविधासम्पन्न कार्यालय भवन, भान्साघर तथा शौचालयको निर्माण कार्य सम्पन्न भएको हो ।
