विराटनगर । आसन्न उपनिर्वाचनबाट मोरङको ग्रामथान गाउँपालिकाको अध्यक्ष बन्नका लागि १६ जनाको उम्मेदवारी परेको छ ।
मुख्य निर्वाचन अधिकृतको कार्यालयका अनुसार एक जना स्वतन्त्र र अरू विभिन्न दलका १६ जनाले आइतबार ग्रामथान गाउँपालिकाको नेतृत्व गर्न उम्मेदवारी दर्ता गराएका हुन् ।
यसरी उम्मेदवारी दर्ता गराउनेमा राष्ट्रिय प्रजातन्त्र पार्टी (राप्रपा)बाट दिनेशकुमार थन्दार (दिवेश), राष्ट्रिय स्वतन्त्र पार्टी (रास्वपा)बाट नवीनकुमार विश्वास, नेकपा (एमाले)बाट तुलसीराम विश्वास, अशोक राई नेतृत्वको जनता समाजवादी पार्टी (जसपा)बाट धर्मेन्द्रकुमार चौधरीको उम्मेदवारी परेको छ ।
त्यस्तै, नेकपा (माओवादी केन्द्र) बाट नमोनारायण माझी, नेपाल मजदुर किसान पार्टी (नेमकिपा)बाट पर्शुराम विश्वास थारू, नेपाली कांग्रेसबाट बलराम सरदार, मंगोल नेशनल अर्गनाइजेसनबाट भरत राई, बाबुराम भट्टराई नेतृत्वको नेपाल समाजवादी पार्टीबाट रामकुमार चौधरीले उम्मेदवारी दर्ता गराएका छन् ।
यसैगरी, जनमत पार्टीबाट विनोदकुमार माझी, नागरिक उन्मुक्ति पार्टीबाट बुद्धिचन विश्वास, नेकपा (एकीकृत समाजवादी) पार्टीबाट दिलबहादुर विश्वकर्मा, कमल थापा नेतृत्वको राप्रपा नेपालबाट राजु मुसहर, समावेशी समाजवादी पार्टी नेपालबाट बोधनारायण माझी र जनता समाजवादी पार्टी नेपालबाट सुरेशकुमार राजवंशीले मनोनयन दर्ता गराएका छन् ।
यस्तै, नमनारायण चौधरीले स्वतन्त्र उम्मेदवारी दिएका छन् । उनले एमालेविरुद्ध बागी उम्मेदवारी दिएका हुन् ।
अब, उम्मेदवारको विरोधमा उजुरी दिन मंसिर ३ गते र उजुरीमाथि छानबिन मंसिर ४ गते गरिने बताइएको छ । उजुरीमाथिको छानबिनपछि उम्मेदवारको नामावली सोही दिन प्रकाशन गरिने भएको छ ।
ग्रामथानमा २६ हजार ४४ मतदाता छन् । संघीयतापछिको पहिलो स्थानीय तहको निर्वाचनमा एमालेका शिवनारायण माझीले ग्रामथानको नेतृत्व गरेका थिए ।
तर, दुई वर्षअघि भएको निर्वाचनमा एमालेका शिवनारायण माझीलाई हराउँदै कांग्रेसका गच्छदार अध्यक्षमा निर्वाचित भएका थिए ।
१० माघ २०८० मा ब्रेन ह्यामरेज भएर थलिएका गच्छदारको गत असार ३ गते निधन भएको थियो । त्यसयता, उपाध्यक्ष गुणावतिदेवी थारूले कार्यबाहक अध्यक्षको जिम्मेवारी सम्हाल्दै आएकी छन् ।
