काठमाडौं । ताजकिस्तानमा जारी थ्री नेशन्स कपमा नेपालले अफगानिस्तानलाई २-० गोलले पराजित गरेको छ । नेपालले १३ वर्षपछि अफगानिस्तानलाई पराजित गरेको हो ।
यसअघि नेपालले अफगानिस्तानविरुद्ध पछिल्लो जित भरत खवासको गोलमा हात पारेको थियो ।
एएफसी च्यालेन्ज कप २०१२ छनोटमा भरतको गोलमा नेपालले दशरथ रंगशालामा १–० (अप्रिल, २०११) को जित निकालेको थियो । त्यसपछि नेपालले अफगानिस्तानविरुद्ध दुई खेल खेलेको छ ।
साफका ती दुवै सेमिफाइनल (नयाँ दिल्ली २०११ र काठमाडौं २०१३) को भेटमा अफगानिस्तानले बाजी मारेको थियो ।
तर, शनिबार सेन्ट्रल स्टेडियम डुसान्बेमा भएको मैत्रीपूर्ण खेलमा नेपालले अफगानिस्तानलाई २–० ले पराजित गरेको हो ।
नेपालको जितमा डिफेन्डर रोहित चन्द र जेलस्पीजंग कार्कीले एक-एक गोल गरे ।
खेलको पहिलो हाफ गोलरहित बराबरीमा सकिएको थियो। तर, दोस्रो हाफको सुरूआतमै जेलस्पीजंगले गोल गर्दै नेपाललाई अग्रता दिलाए ।
७८औं मिनेटमा रोहितले करियरकै पहिलो गोल गरे । सन् २००९ मा प्यालिस्टाइनविरुद्ध १७ वर्षकै उमेरमा उनले राष्ट्रिय टोलीमा डेब्यु गरेका थिए ।
तर, त्यसबीचमा गोल गर्न नसकेका रोहितले करियरकै पहिलो गोल गरेका हुन् ।
