विराटनगर । आसन्न उपनिर्वाचनमा राजेन्द्र लिङदेन अध्यक्ष रहेको राष्ट्रिय प्रजातन्त्र पार्टी (राप्रपा) ले मोरङको ग्रामथान गाउँपालिका अध्यक्षको लागि उम्मेदवार चयन गरेको छ ।
३० वैशाख २०७९ को चुनावबाट निर्वाचित नेपाली कांग्रेसका जयप्रकाश गच्छदार थारूको निधनपश्चात हुन गइरहेको उपनिर्वाचनमा राप्रपाले उम्मेदवारको टुंगो गरेको हो ।
राप्रपा मोरङको बुधबार बसेको बैठकले दिनेशकुमार थान्दारलाई अध्यक्षको उम्मेदवार बनाएको हो ।
बैठकले थान्दारलाई सर्वसम्मत रूपमा अध्यक्षको उम्मेदवार बनाएको हो ।
आगामी मंसिर १६ गते ग्रामथान गाउँपालिकामा अध्यक्ष पदका लागि उपनिर्वाचन हुँदै छ ।
जसका लागि ठुला भनिएका नेपाली कांग्रेस, नेकपा एमाले र नेकपा माओवादी केन्द्रले आफ्ना उम्मेदवार तय गरिसकेका छन् ।
कांग्रेसबाट बलराम सरदार, एमालेबाट तुलसीराम विश्वास र माओवादीका नमोनारायण माझीले चुनावी प्रतिस्पर्धा गर्ने निश्चित भइसकेको छ ।
दुई वर्षअघि भएको निर्वाचनमा एमालेका शिवनारायण माझीलाई हराउँदै कांग्रेसका गच्छदार अध्यक्षमा निर्वाचित भएका थिए ।
तर, १० माघ २०८० मा ब्रेन ह्यामरेज भएर थलिएका गच्छदारको गत असार ३ गते निधन भएको थियो ।
त्यसयता, उपाध्यक्ष गुणावतिदेवी थारूले कार्यबाहक अध्यक्षको जिम्मेवारी सम्हाल्दै आएकी छन् ।
