विराटनगर । मोरङको विराटनगर महानगरपालिकाबाट प्रहरीले ठूलो परिमाणमा लागुऔषध गाँजा बरामद गरेको छ ।
नेपाल–भारत सीमा क्षेत्रबाट एउटा भारतीय नम्बरप्लेटको कारमा एक सय ३ केजी गाँजा फेला परेको मोरङ प्रहरीले जनाएको छ ।
विराटनगर महानगरपालिका–१५ स्थित २ नम्बर ढाट हुँदै भारततर्फ जान लागेको कारलाई शंका लागेर चेकजाँच गर्दा उक्त गाँजा भेटिएको हो ।
कोशी प्रदेश प्रहरी कार्यालय विराटनगरको प्रहरी टोलीले भारततर्फ जाँदै गरेको बिआर ३८ एडब्लू ३७७६ नम्बरको भारतीय नम्बरको कार रोक्न खोज्दा कार चालक कार छाडेर भागेको प्रहरीले जनाएको छ ।
चालक फरार भएपछि कारलाई नियन्त्रणमा लिएर खानतलासी गर्दा कारको पछाडि डिक्कीमा लागुऔषध गाँजा फेला परेको थियो ।
कसले कहाँबाट ल्याएको हो भन्ने खुली नसकेको प्रहरीले जनाएको छ ।
प्रहरीको प्रारम्भिक अनुसन्धानबाट कारभित्र भेटिएको चालक अनुमतिपत्र (लाइसेन्स)भारतीय नागरिकको रहेको खुलेको छ भने थप विषयमा अनुसन्धान भइरहेको प्रहरीले जनाएको छ ।
