विराटनगर । नेपाली महिला फुटबलकी स्ट्राइकर सावित्रा भण्डारी आइतबार राति स्वदेश आइपुगेकी छन् ।
काठमाडौंमा जारी दक्षिण एसियाली फुटबल महासंघ (साफ) महिला च्याम्पियनसिप २०२४ का लागि सावित्रा फ्रान्सबाट नेपाल फर्किएकी हुन् ।
सोमबार समूह चरणको दोस्रो खेलका लागि भने सावित्रा उपलब्ध हुने सम्भावना रहेको छ ।
प्रशिक्षक राजेन्द्र तामाङले १२ घण्टाको विश्रामपछि सावित्राले चाहेको अवस्थामा खेल्न सक्ने बताएका छन् ।
महिला साफ च्याम्पियनसिपको इतिहासमै पहिलोपल्ट भुटानसँग अंक बाँडेको नेपालले सोमबार (आज) माल्दिभ्ससँग खेल्दै छ ।
समूह चरणको दोस्रो खेलअन्तर्गत नेपालले त्रिपुरेश्वरस्थित दशरथ रंगशालामा माल्दिभ्ससँग खेल्न आँटेको हो ।
समूह ‘बी’ बाट सेमिफाइनल पुग्नका लागि नेपाललाई माल्दिभ्स र श्रीलंकासँगका खेल निकै महत्त्वपूर्ण हुने छ ।
भुटानसँगको खेलमा घाइते भएकी डिफेन्डर हिराकुमारी भुजेल र मिडफिल्डर दीपा शाहीले अब पूरा प्रतियोगिता खेल्न नसक्ने भएका छन् ।
एसिएल चोटका कारण करिब नौ महिना मैदानबाहिर रहनुपर्ने भएका उनीहरू आइतबारको प्रशिक्षणमा पनि उपस्थित हुन सकेनन्, जसबाट टिम निराश छ ।
तर, ‘गोल मेसिन’ का नामले परिचित फरवार्ड साम्बा स्वदेश फर्किएकी छन् ।
फ्रान्समा रहेर व्यवसायिक फुटबल खेलिरहेकी साम्बाको आगमनले टिमले केही राहत महसुस गरेको छ ।
साम्बाले चाहेमा उनलाई माल्दिभ्ससँगको खेलबाटै मैदान प्रवेश गराउने तयारी मुख्य प्रशिक्षक राजेन्द्र तामाङको छ ।
इएन अभान्ट गुईग्याम्पबाट फ्रान्स शीर्ष श्रेणीको महिला लिग फुटबल खेलिरहेकी साम्बाले भने क्लब ड्युटीका कारण साफमा नेपाल र भुटानबीचको पहिलो खेल गुमाएकी थिइन् ।
जुन, खेलमा नेपाल भुटानसँग गोलरहित बराबरीमा रोकिएको थियो ।
साम्बा आएपछि नेपाली टिम बलियो हुने अपेक्षा छ ।
पहिलो खेलमा भुटान विरुद्ध नेपाल फिनिसिङमा चुक्दा साम्बाको अभाव देखिएको थियो ।
नेपाल र माल्दिभ्सबीचको खेल साँझा ५ः३० बजेबाट सुरु हुनेछ । त्यसअघि दिउँसो १ः३० बजे श्रीलंका र भुटानले खेल्ने छ । समूह ‘बी’ मा तीन अंकसहित शीर्ष स्थानमा रहेको श्रीलंका दोस्रो जितको खोजीमा हुने छ । यसअघि उसले माल्दिभ्सलाई १–० गोलले हराएको थियो । नेपालसँग बराबरी खेल्न सफल भुटान भने पहिलो जितको खोजीमा छ । भुटान एक अंकसहित तालिकाको दोस्रो स्थानमा छ ।
