विराटनगर । मोरङको ग्रामथान गाउँपालिकामा रोकिराखेको ट्रकमा मोटरसाइकल ठोक्किँदा एक युवक घाइते भएका छन् ।
आइतबार राति ८:४० बजेतिर घिनाघाट-विराटचोक सडकखण्डअन्तर्गत ग्रामथान-५ बांगेचोकमा उक्त दुर्घटना भएको हो ।
हरैंचाबाट झोराहाटतर्फ आउँदै गरेको को ३३ प ८८८५ नम्बरको मोटरसाइकलले बाटोको छेउमा रोकिराखेको ना ५ ख ९७३९ नम्बरको ट्रकलाई पछाडिबाट ठक्कर दिएको थियो ।
जसमा मोटरसाइकल चालक ग्रामथान-३ बस्ने २३ वर्षीय नितेश सरदारको अनुहारमा चोट लागेको छ ।
सामान्य अवस्थाका उनलाई उपचारको लागि नोबेल अस्पताल विराटनगर पठाइएको प्रहरीले जनाएको छ ।
दुर्घटनालगत्तै ट्रक चालक भने फरार बनेका थिए । उनको खोजी कार्य भइरहेको प्रहरी चौकी तेतरियाले जनाएको छ ।
प्रहरीका अनुसार मोटरसाइकल चालकको साथमा लाइसेन्स थिएन । अनि उनले मोटरसाइकल तीव्र गतिमा हाँकेका थिए ।
