विराटनगर । चेल्सीमाथि जित निकाल्दै लिभरपुल इंग्लिस प्रिमियर लिगको शीर्ष स्थानमा फर्किएको छ ।
आइतबार राति घरेलु मैदान एन्फिल्डमा भएको खेलमा चेल्सीलाई २-१ गोलले हराउँदै लिभरपुल शीर्ष स्थानमा उक्लिएको हो ।
लिभरपुलले आठ खेलमा २१ अंक जोडेको छ । साविक विजेता म्यानचेस्टर सिटी भने दोस्रो स्थानमा खस्किएको छ ।
सिटीले समान खेलमा २० अंक जोडेको छ । लिभरपुलसँग पराजित चेल्सी भने १४ अंकका साथ छैटौं स्थानमा छ ।
गए राति लिभरपुललाई जिताउन मोहम्मद सालाह र कर्टिस जोन्सले एक-एक गोल गरे । चेल्सीका निकोलास ज्याकसनले एक गोल गरे ।
