दुहवी । सुनसरीको दुहवी नगरपालिका-१ प्रास्टोकीमा थारूहरूको महान् पर्व गोठालेको अवसरमा गोठाले साँस्कृतिक साँझ सम्पन्न भएको छ ।
ग्रामीण समाज सेवा केन्द्र दुहवीको आयोजना र थारू कल्याणकारीसभा दुहवीको संयोजनमा उक्त कार्यक्रम आयोजना गरिएको थियो ।
प्रमुख अतिथि दुहवी नगर प्रमुख वेदनारायण गच्छदारले पानसमा दीप प्रज्ज्वलन गरी कार्यक्रमको उद्घाटन गरेका थिए ।
कार्यक्रमलाई शुभकामना दिँदै प्रमुख अतिथि गच्छादारले नेपालको कुल जनसंख्याको ६.७ प्रतिशत अर्थात् करिब २० लाख हाराहारी बाहुल्यता रहेको थारू जाति नेपालको सबैभन्दा पुरानो आदिवासी समुदाय रहेको प्रस्ट्याए ।
ऐतिहासिक थारू समुदायको पहिचान र प्रगतिमा अरू समुदायभन्दा पछाडि परेका थारू सम्दायहरूले आफूलाई स्थापित गराउन नाचगान मात्रै गरेर नहुने उनको भनाइ छ ।
बरु, चिन्तन मनन गरेर आजकै दिनदेखि शैक्षिक क्षेत्रमा, रोजगारी, ब्यावसायी क्षेत्रमा र आर्थिक उन्नतिको क्षेत्रमा दृढ संकल्पसहित अगाडि बढ्न अब ढिलो नगर्न उनले अपिल गरे ।
सप्ताहव्यापी खेलकुद प्रतियोगितामा विभिन्न स्थान ल्याउने प्रतियोगीहरूलाई उनले पुरस्कारसमेत वितरण गरेका थिए ।
कार्यक्रमको अध्यक्षता महेश माझीले गरेका थिए भने सञ्चालन पारस विश्वासले गरेका थिए ।
