काठमाडाैं । सशस्त्र प्रहरी निरीक्षक दिल बहादुर बडुवालको निधन भएको छ ।
विपद् उद्दार र राहत वितरण कार्यमा खटिएका उनको सोमबार (आज) बिहान नेपाल एपिएफ अस्पताल बलम्बुमा निधन भएको हो ।
विपद् व्यवस्थापनका लागि सशस्त्र प्रहरी बलले गत असार २ गते काभ्रे जिल्लाको पनौती नगरपालिका-५ आइटी पार्कमा मनसुनजन्य विपद् व्यवस्थापन बेस स्थापना गरेको थियो ।
सोही बेसमा साउन ३ गतेदेखि कमान्डर रहेका बडुवाल हालसम्म त्यहीँ कार्यरत थिए ।
पछिल्लो समय असोज ११ गते देखिको अबिरल वर्षाका कारण काभ्रेको विभिन्न ठाउँमा भएको धनजनको क्षतिमा उद्दारका लागि उनको कमान्डमा सशस्त्र प्रहरी बल निरन्तर खटिएको थियो ।
सो बेसबाट काभ्रेको रोशी, भुमिडाँडा, बेथानचोक नार्केबजार, मंगलटार, कालढुंगा, बाल्टिङ लगायतका स्थानमा परिचालित थियो ।
सशस्त्र प्रहरी निरीक्षक बडुवालाई ज्वरोलगायतका समस्या देखिएपछि असोज २६ गते नेपाल एपीएफ अस्पताल बलम्बुमा भर्ना गरि उपचार गरेकोमा आज २८ गते सोमबार बिहान उनको निधन भएको हो ।
बर्दिया घर भएका बडुवालले २०६० सलबाट सशस्त्र प्रहरी सहायक निरीक्षक दर्जाबाट सेवा प्रवेश गरेका थिए ।
