एजेन्सी । बेल्जियममा स्थानीय सरकारका लागि भएको निर्वाचनमा दुई नेपाली उम्मेदवारले जित हासिल गरेका छन् ।
बेल्जियममा सोमबार भएको स्थानीय निकायको निर्वाचनमा दुई नेपालीमूलका उम्मेदवारले नयाँ इतिहास रच्दै निर्वाचित भएका हुन् ।
बेल्जियमको राजनीतिमा नेपालीको नवीन छलाङ मार्दै तीन दशकयता नेपाली बसोबास गर्न थालेदेखि पहिलोपटक प्रत्यक्ष चुनावी प्रतिस्पर्धामा नेपालीहरू विजयी भएका हुन् ।
दोस्रो पुस्ताको सानदार आगमनसँगै भबिष्यको राजनीतिक बाटो उज्ज्वल बनेको छ ।
स्वायत्त र भाषिक आधारमा तीन प्रान्त रहेको संघीय र राजतन्त्रात्मक मुलुक, युरोपको राजधानीको रूपमा समेत परिचित बेल्जियमको आज सम्पन्न स्थानीय निकायको निर्वाचनमा निर्वाचन अन्तर्गत ब्रुगे नगरपालिकाको सदस्यमा नेपाली दोस्रो पुस्ताकी प्रज्ञा तिमिल्सिना र लुभेन नगरपालिका सदस्यमा पहिलो पुस्ताका सूर्य ढकाल निर्वाचित भए ।
निर्वाचनमा अन्य नगरपालिका र अन्य क्षेत्रमा ११ नेपाली पनि उम्मेदवार बनेको भए पनि तिमिल्सिना ७८८ र ढकाल १०७४ मत प्राप्त गरी निर्वाचित भए ।
ब्रुगे नगरपालिकाको सदस्यमा निर्वाचित तिमिल्सिना सानो उमेरमा राजनीतिमा प्रवेश गरेकी छन् ।
उनी सबैभन्दा कम उमेरमा उक्त नगरको सदस्यमा निर्वाचित भइन् ।
कास्की नेपालमा जन्मिएकी सबैभन्दा कान्छी सदस्यको रूपमा निर्वाचित २५ वर्षीया प्रज्ञाले निर्वाचनमा सहयोग गर्नेहरूप्रति आभार प्रकट गरिन् ।
उनका बुबा पूर्ण तिमिल्सिना नेपाली कांग्रेसको भातृ संगठन नेपाली जनसम्पर्क समिति बेल्जियमका निवर्तमान सभापति एवम् नेपाल विद्यार्थी संघ कास्कीका पूर्वसभापति हुन् ।
बेल्जियमको स्थानीय निर्वाचन यस पटक करिब ४५ प्रतिशतको हाराहारीमा मात्र मत खसेको थियो। गत निर्वाचनमा ६० प्रतिशत मत खसेको थियो ।
गाउँपालिका नगरपालिकासहित ५८१ स्थानमा भएको निर्वाचनमा सूर्य ढकाल सत्तारूढ पार्टीबाट लुभेन नगरपालिकामा विजयी बने ।
ढकाल आधिखोला गाउँपालिका,फापरथुम निबुवाबोट स्याङजामा जन्मिएका हुन् ।
अनुमानित १५ हजार नेपाली बसोबास गर्ने बेल्जियमको लुभेन क्षेत्रबाट कृष्ण सगुन क्षेत्री र ब्रुज क्षेत्रबाट रमेश कँडेल भने जितको नजिक पुगेर पराजित भए ।
