विराटनगर । युवा नेता तथा सामाजिक अभियन्ता अभिषेक गिरीले सुनसरीको बर्जु गाउँपालिकामा विपन्न आर्थिक अवस्था भएका परिवारका विद्यार्थीहरूलाई छात्रवृत्ति प्रदान गरेका छन् ।
बिहीबार बर्जु-५ अमाही बेलास्थित फार्म प्राविमा आयोजित एक कार्यक्रममा कोशी सुधार अभियानका संयोजक गिरीले १० विपन्न विद्यार्थीलाई छात्रवृत्ति प्रदान गरेका हुन् ।
बर्जु युवा क्लबको आयोजनामा भएको दसैं, तिहार र छठ पर्वको शुभकामना आदानप्रदानसमेत गरिएको उक्त कार्यक्रममा गिरीले छात्रवृत्ति बाँडेका हुन् ।
कार्यक्रममा बोल्दै गिरीले बर्जुका युवाहरूले शिक्षा क्षेत्रमा उल्लेखनीय प्रगति गरिरहेको बताए ।
शिक्षाप्रति यहाँका युवाहरूको हेर्ने नजरका कारण सिंगो पालिकाभरिको शिक्षामा आमुल परिवर्तन हुन सक्ने उनको अनुमान छ ।
पालिकाभित्रका विपन्न परिवारका विद्यार्थीहरूलाई पठनपाठनमा आवश्यक पर्ने सामग्रीहरू सहयोग गर्नेसमेत उनको वचनबद्धता छ ।
केही महिनाअघि सार्वजनिक तथा निजी अस्पताल र सामुदायिक विद्यालय सुधार गर्ने, सार्वजनिक सम्पत्तिको संरक्षण गर्ने, सरसफाइ र वृक्षारोपणमा सक्रियता जनाउने लक्ष्यसहित कोशी सुधार अभियान गठन गरिएको थियो ।
उक्त अभियानमार्फत् शिक्षा, स्वास्थ्यलगायत विविध विषयमा सुधार गर्न तम्सिएका गिरीको सक्रियतामा विद्यार्थीहरूले छात्रवृत्ति पाएका हुन् ।
गिरीले कोशी सुधार अभियानमार्फत् विराटनगरका केही निजी तथा सार्वजनिक अस्पतालमा निरीक्षण गर्ने कामलाई तीव्रता दिइरहेका छन् ।
