विराटनगर । कोशी सुधार अभियानअन्तर्गत आइतबार मोरङको बेलबारी नगरपालिकामा रहेको एक विद्यालयमा सरसफाइ तथा वृक्षारोपण कार्यक्रम गरिएको छ ।
केही महिनाअघि सार्वजनिक तथा निजी अस्पताल र सामुदायिक विद्यालय सुधार गर्ने, सार्वजनिक सम्पत्तिको संरक्षण गर्ने, सरसफाइ र वृक्षारोपणमा सक्रियता जनाउने लक्ष्यसहित गठन गरिएको अभियानले आज उक्त कार्यक्रम गरेको हो ।
कोशी सुधार अभियानमार्फत् शिक्षा, स्वास्थ्यलगायत विविध विषयमा सुधार गर्न तम्सिएका युवा नेता अभिषेक गिरीले बेलबारी-७ स्थित श्री जानकी आधारभूत विद्यालयमा सरसफाइ तथा वृक्षारोपण कार्यक्रम गरेका हुन ।
गिरी फाउन्डेसनका अध्यक्षसमेत रहेका गिरीले उक्त विद्यालयमा सरसफाइमा सघाउ पुर्याउँदै र विभिन्न बिरुवा रोपेका हुन् ।
कार्यक्रममा बोल्दै गिरीले उक्त विद्यालयको जीर्ण भवन स्तरोन्नति गर्ने विषयमा पहल थाल्ने प्रतिबद्धतासमेत जनाएका छन् ।
विपन्न परिवारका विद्यार्थीहरू पढ्ने उक्त विद्यालयमा आवश्यक सहयोग गर्नेसमेत उनको वचनबद्धता छ ।
गिरीले कोशी सुधार अभियानमार्फत् विराटनगरका केही निजी तथा सार्वजनिक अस्पतालमा निरीक्षण गर्ने कामलाई तीव्रता दिइरहेका छन् ।
