दुहबी । सुनसरीको दुहबी नगरपालिकामा अनधिकृत बस्ती हटाएर खाली गरिएको ठाउँमा चारतले ब्यापारिक भवन बन्ने भएको छ ।
दुहबी-५ मा बिहीबार उक्त बहुउद्देश्यीय ब्यावसायिक भवनको शिलान्यास भएको हो । नयाँ बन्ने भवन बेस मेन्ट पार्किङसहित चार तलाको बन्ने छ ।
वर्षातका बीच नगर प्रमुख वेदनारायण गच्छादारले धार्मिक अनुष्ठानका साथ उक्त बहुउद्देश्यीय ब्यापारिक भवनको शिलान्यास गरे ।
दुहबी नगरपालिकाले गत वर्षको वैशाख ५ गते ७० वर्षदेखि अनधिकृत रूपमा नगरपालिकाको स्वामित्व रहेको जग्गा ओगटेर बनेका अवैध घर-टहरा भत्काएर खाली गरेको थियो ।
दुहबीलाई सुन्दर र आधुनिक बजारको रूपमा विस्तार गर्न बहुआयामिक भवन निर्माण गर्ने सोचले नगर प्रमुख गच्छादारले ठुलै आँट र हिम्मतका साथ दर्जनौं डोजर प्रयोग गरी टहरा खाली गराएका थिए ।
क्रमशः उनले नगर पालिकाको सार्वजनिक सम्पत्ति ब्यक्तिले भोग गर्नुभन्दा आम जनताको सम्पत्ति होस् र हरेक नगरबासीले कुनै न कुनै माध्यमले उपयोग गर्न पाउन् भन्ने उद्देश्यले बाँकी रहेका तीनवटा प्लट पनि खाली गराएका थिए ।
खाली प्लटमध्ये पहिलो खाली प्लटमा दुहबी बहुउद्देश्यीय ब्यापारिक भवनको कन्सेप्ट लिएर तत्काल डिपिआर गरिएको थियो ।
घर टहरा खाली गराएको एक वर्ष नपुग्दै गत वर्षको चैत्र ४ गते नगर विकाष कोषका सिइओ कृष्णप्रसाद सापकोटा र दुहबी नगरपालिकाबीच ६०/४० सहलगानीका लागि सम्झौता भएको थियो ।
सम्झौतामा अनुमानित लागत ३२ करोड ८४ लाख २९ हजार रहेको भएता पनि ठेक्का प्रक्रियामा एसोसियट जिक्याम बैकुन्ठ जेभी ललितपुरले भ्याट र कन्टिजेन्सीसहित २० करोड २ लाख ८७ हजार ९७ रुपैया ७४ पैसामा असोज ८ गते सम्झौता गरेको थियो ।
सम्झौतामा २०८३ साल असोज १० गते निर्माण सम्पन्न गरिसक्नु पर्ने उल्लेख छ ।
भवनको शिलान्यासपछि बोल्दै नगर प्रमुख गच्छादारले अरूको रिस डाहा र इर्ष्याले आफू स्वयमलाई सिध्याउनसक्ने हुँदा नकारात्मक होइन सकारात्म्क सोचले अगाडि बढे हरेक सफलता मिल्ने र समग्र दुहबीले परिवर्तनको मुहार फेर्न सक्ने बताए ।
दुहबीलाई ‘डेथ सिटीबाट लाइभ सिटीमा’ बदल्न सिंगो नगरबासी, युवापिँढी र बुद्दिजीवीहरूले सोच परिवर्तन गर्न अब ढिला गर्नु नहुने उनको भनाइ छ ।
उनले दुहबी बहुउद्देश्यीय सपिङ कम्प्लेक्स शिलान्यास गर्न पाउँदा आफूमात्र नभएर समग्र दुहबीबासीमा खुशी छाएको विश्वास गरेका थिए ।
उनले बिल्डअप एरियाका कारण दुहबीको कोशी मार्ग साघुँरो भएकोले बजारको दुर्दशा भएकोले यसलाई चौंडा बनाउन अदालात नगई सहजीकरण गरिदिन बजारबासीलाई आग्रह गरे ।
उपप्रमुख मेनुका खतिवडाले बाल्यकालदेखि नै सुन्दै आएको पूर्वकै पुरानो बजार र ठुलो बजार अहिले कुरुप र शून्य लाग्ने अवस्था आउनु आधुनिकीकरणको उपयोग नगर्नु कारक रहेको बताइन् ।
वडा नम्बर ५ का अध्यक्ष रमेश रौनियारले बजार विस्तार र सुन्दर अनि बृहत् दुहबी निर्माणमा केही ब्यक्ति मुख्य बाधक रहेको बताए ।
तथापि, कालान्तरमा त्यस्ता ब्यक्तिलाई बजारबासीले पनि नङ्याउनेमा आफू विश्वस्त रहेको उनको भनाइ छ ।
