विराटनगर । मोरङको विराटनगर महानगरपालिकामा घटस्थापनाको दिनदेखि सात दिनसम्म चौथो संस्करणको विराट सडक महोत्सव हुने भएको छ ।
असोज १७ गते (भोलि) देखि आफ्नो संस्कृति र परम्पराको जगेर्णा गर्ने लक्ष्यका साथ सडक महोत्सव हुने भएको हो ।
बुधबार पत्रकार सम्मेलन गरी आयोजक मन्जिना मुभिज क्रेसनले भोलिबाट लाग्ने महोत्सवको तयारी पूरा भएको जानकारी दिएको हो ।
आयोजक संस्थाका संयोजक जतिन ताम्राकारका अनुसार भोलि दिउँसो ४ बजे विराटनगर महानगर प्रमुख नागेश कोइराला र उपप्रमुख शिल्पा निरला कार्कीले महोत्सवको उद्घाटन गर्ने छन् ।
दसैंलाई मध्येनजर गरेर लाग्ने महोत्सवमा विभिन्न खानाका परिकार पाउने स्टलहरू रहने छन् । साथै, स्थानीय कलाकारहरूको पनि बेजोड प्रस्तुति रहने ताम्राकारले जानकारी दिए ।
विगत तीन वर्षदेखि हुँदै आएको महोत्सवलाई निरन्तरता दिँदै अन्तिम पटक हिमालयन रोडमा महोत्सव आयोजना गर्न लागेको उनको भनाइ छ ।
स्थानीय व्यापारीहरूले आफूहरूलाई व्यापारमा सकस हुने र यातायात आवतजावतमा समस्या हुने भएकाले अन्तिमपटक हिमालयन रोडमा महोत्सव लगाइन आँटिएको हो ।
