विराटनगर । स्वास्थ्य कार्यक्रममा दुहबी नगरपालिका सुनसरी जिल्लाकै पहिलो बनेको छ ।
कार्यसम्पादन मूल्यांकनका आधारमा जिल्ला जनस्वास्थ्य कार्यलयले गरेको सर्वेक्षणमा सुनसरीका १२ वटा पालिकामध्ये दुहबी नगरपालिकाले प्रथम स्थान हासिल गरेको हो ।
आर्थिक बर्ष २०८०/८१ को स्वास्थ्य कार्यक्रम मूल्यांकन गर्दा हालसम्म कै उदाहरणीय र जनस्वास्थ्य क्षेत्रमा उल्लेखनीय कार्य गरेको भन्दै आज प्रमाणपत्र दिएको छ ।
दुहबी नगरपालिकाले जनताको स्वास्थ्यमा उल्लेखनीय सुधारका कार्यक्रम गर्दै आएको छ ।
कोभिडको समयमा क्वारेन्टाइन, महिलाको पाठेघर क्यान्सरको परीक्षण, गर्भवती महिलाको अवस्था, प्रोटेबल भिडियो एक्से मेसिनद्वारा गर्भवती जाँच, बर्थिङ सेन्टर, विवाहितको लागि शुभकामना कार्ड, सुनौला हजार दिन, बिपन्न स्वास्थ्य सेवा बिमा, अपांग रोकथाम तथा उपचारलगायत दर्जनौं स्वास्थ्यसम्बन्धी कार्यक्रम समुदायस्तरमा सञ्चालन गरेको थियो ।
जनस्वास्थ्यको क्षेत्रमा दुहबी नगरपालिकाले ठुलो लगानी गरेको छ । १२ वटै वडामा स्वास्थ्य संस्था, महिला, बालबालिका र जेस्ठ नागरिकका लागि स्वास्थ्य कार्यक्रमहरू, कुपोषण र दीर्घरोगीहरूको पहिचान र उपचारजस्ता कार्यक्रम गर्दै आएको छ ।
