काठमाडौं । विवादित अभियन्ता तथा मेडिकल व्यवसायी दुर्गा प्रसाईंलाई थप पाँच दिन हिरासतमा राख्न प्रहरीले अनुमति पाएको छ ।
आइतबार पक्राउ परेका प्रसाईंलाई बुधबार म्याद थपका लागिकाठमाडौं जिल्ला अदालत पेस गरिएको थियो ।
जसमा न्यायाधीश श्यामविहारी मौर्यले पाँच दिन हिरासतमा राखेर अनुसन्धान गर्न अनुमति दिएको सूचना अधिकारी मेलिश बास्कोटाले जानकारी दिए ।
प्रसाईंविरुद्ध विद्युतीय कारोबार ऐन, २०६३ को दफा ४७ अन्तर्गत कसुर गरेको आरोपमा जाहेरी परेको छ ।
एक महिलाले साइबर ब्यूरोमा प्रसाईंले आफ्नो चरित्र हत्या गरेको भन्दै उजुरी दिएकी थिइन् ।
उजुरीपछि आइतबार प्रसाईंलाई साइबर ब्युरोले उनको भक्तपुरस्थित निवासबाट पक्राउ गरेको थियो ।
आइतबार नै उनलाई अदालत पेस गरिएको थियो। त्यतिबेला उनलाई तीन दिन हिरासतमा राख्न अनुमति दिइएको थियो।
मंगलबार बयान लिन प्रसाईंलाई सरकारी वकिल कार्यालय काठमाडौंमा पेस गरिएको थियो । सरकारी वकिल कार्यालयमा उनीसँग दुई घण्टा बयान लिइएको थियो ।
उनीविरूद्ध विद्युतीय कारोबार ऐन, २०६३ को दफा ४७ अनुसारको कसुर गरेको भन्दै जाहेरी परेको थियो ।
यसअघि सोमबार प्रसाईंका छोरा निराजनले सर्वोच्च अदालतमा बन्दी प्रत्यक्षीकरणको रिट दायर गरेका थिए ।
तर, न्यायाधीश प्रकाशमान सिंह राउतको इजलासले मंगलबार प्रधानमन्त्री तथा मन्त्रिपरिषदको कार्यालय, गृह मन्त्रालय र साइबर ब्यूरोलाई कारण देखाउ आदेश जारी गरेको छ ।
अदालतले प्रसाईंलाई नछाड्ने निर्णय गर्दै १५ दिनभित्र जवाफ मागेको थियो ।
