विराटनगर । मोरङको विराटनगर महानगरपालिका-४ बरगाछीस्थित हेरिटेज इन्टरनेसनल स्कुलमा अध्ययनरत दुई विद्यार्थी थाइल्यान्ड जाने भएका छन् ।
इन्डुर्यान्स स्केट्स प्रतियोगितामा भाग लिन हेरिटेजको कक्षा २ मा पढ्ने कुनाल कामत र कक्षा ७ मा अध्यनरत गोविन्द गोयल अग्रवाल थाइल्यान्ड जाने भएका हुन् ।
थाइल्यान्डमा पाँच दिने चल्ने उक्त प्रतियोगितामा १२ देशका खेलाडीहरू सहभागी हुने छन् । सो प्रतियोगितामा नेपालको प्रतिनिधित्व गर्दै ८ वर्षीय कुनाल र ११ वर्षीय गोविन्द थाइल्यान्ड जान लागेको स्कुलका प्रिन्सिपल सुशान्त बाँनियाले जानकारी दिए ।
आइतबार एक कार्यक्रमबीच स्कुलले थाइल्यान्ड जाने विद्यार्थीहरूलाई बिदाइ गरेको छ । उनीहरू आगामी बुधबार काठमाडौंस्थित त्रिभुवन अन्तर्राष्ट्रिय विमानस्थल हुँदै थाइल्यान्ड प्रस्थान गर्ने बताइएको छ ।
जितको शुभकामनासहित बिदाइ गर्दै प्रिन्सिपल बानियाँले स्कुलले पठनपाठनका अलाबा पनि अतिरिक्त क्रियाकलापमा उत्तिको जोड दिने भएकाले नवप्रतिभावान खेलाडी उत्पादनमा सहजता थपिएको सुनाए ।
उनका अनुसार कुनालले १० वर्षमुनिका खेलाडीहरूबीच प्रतिस्पर्धा गर्ने छन् भने गोविन्दले अन्डर-१४ समूहमा खेल्ने छन् ।
विराटनगरको उत्कृष्ट विद्यालयमध्येको एक हेरिटेजले पठनपाठनबाहेक खेलकुदलगायत अतिरिक्त क्रियाकलापहरूमा जोड दिँदै आएको छ ।
केही दिनअघि स्कुलले स्विमिङ प्रतियोगिताको आयोजना गरेको थियो । त्यसअघि भने हेरिटेजले कक्षा ४ देखि १० कक्षासम्मका विद्यार्थीहरूलाई महिनावारी, महिनावारीको समयमा हुने शारीरिक र भावनात्मक परिवर्तनहरू, महिनावारीको समयमा हुने गलत अभ्यासलगायत विषयमा सचेत गराएको थियो ।
