विराटनगर । गिरी फाउन्डेसनका अध्यक्ष अभिषेक गिरीले केही समययता कोशी सुधार अभियानको नेतृत्व गरिरहेका छन् ।
अघिल्लो महिना सार्वजनिक तथा निजी अस्पताल र सामुदायिक विद्यालय सुधार गर्ने, सार्वजनिक सम्पत्तिको संरक्षण गर्ने, सरसफाइ र वृक्षारोपणमा सक्रियता जनाउने लक्ष्यसहित गिरीले कोशी सुधार अभियानको कमिटी नै गठन गरेका थिए ।
सोही अभियानअन्तर्गत शिक्षा, स्वास्थ्यलगायत विविध विषयमा सुधार गर्न तम्सिएका गिरीले केही दिनअघि सुनसरीको बर्जु गाउँपालिका-५ बर्जुमा स्थानीय युवाहरूले गरिरहेको निःशुल्क ट्युसन सेन्टरको अनुगमन गरेका छन् ।
स्थानीय युवाहरूले निःशुल्क रूपमा करिब २०० सय जना जति विद्यार्थीहरूलाई सामुदायिक र संस्थागत रूपमा ट्युसन क्लास चलाउँदै आइरहेका छन् ।
त्यसरी कक्षा सञ्चालन गरिरहँदा उनीहरूमाथि पर्नसक्ने आर्थिक कठिनाइलगायत विभिन्न समस्याहरूबारे जानकारी लिई गिरीले आवश्यक सहयोग गर्ने प्रतिबद्धतासमेत जनाए । उनका साथमा श्री कोशी आधारभूत विद्यालय बर्जु र देवानगन्ज गाउँपालिकाको श्री कृष्ण आधारभूत विद्यालयका प्रतिनिधि पनि थिए ।
उनीहरूका साथमा बर्जु गाउँपालिकाका निवर्तमान अध्यक्ष रघुन्दन चौधरी, नेपाल शिक्षक महासंघ बर्जु कार्यसमितिका अध्यक्ष विजय चौधरी, बर्जु ५ का निवर्तमान वडाअध्यक्ष किशोर चौधरी, शिक्षक आनन्दी चौधरीलगायतको पनि उपस्थिति रहेको थियो ।
गिरीले कोशी सुधार अभियानमार्फत् विराटनगरका केही निजी तथा सार्वजनिक अस्पतालमा निरीक्षण गर्ने कामलाई तीव्रता दिइरहेका छन् । त्यसबाहेक केही दिनअघि सुन्दरहरैंचा नगरपालिकामा-५ स्थित हसिना सिमसार तथा पर्यटकीय क्षेत्रमा केही दिनअघि वृक्षारोपण गर्ने र सरसफाइ गर्ने स्थानीयको काममा सघाउ पुर्याएका थिए ।
