विराटनगर । मोरङको विराटनगर महानगरपालिका-४ बरगाछीस्थित हेरिटेज इन्टरनेसनल स्कुलले आफ्ना विद्यार्थीहरूलाई महिनावारी सचेतना प्रदान गरिएको छ ।
स्कुलले गत बिहीबार ४-१० कक्षा पढ्ने विद्यार्थीहरूलाई महिनावारी, महिनावारीको समयमा हुने शारीरिक र भावनात्मक परिवर्तनहरू, महिनावारीको समयमा हुने गलत अभ्यासलगायत विषयमा सचेत गराइएको थियो ।
विराटनगर नर्सिङ क्याम्पसकी सहायक प्राध्यापक पुनम मण्डल महिनावारीका विषयमा विद्यार्थीहरूका लागि सचेतनामुलक ‘सेसन’ चलाएकी थिइन् ।
मण्डलले उमेर नपुगी किशोरावस्थामा प्रवेश गर्नु र महिलाहरूमा महिनावारी सुरु हुनु भनेको सुक्ष्म रूपमा देखिएको महत्त्वपूर्ण समस्या रहेको औंल्याउँदै यस्तो बेलामा सचेत र संयम बन्नु जरुरी रहेको बताइन् ।
महिनावारी एक प्राकृतिक र स्वस्थ प्रक्रिया भएको उल्लेख गर्दै उनले महिनावारीको समयमा नियमित स्यानिटरी प्याड परिवर्तनलगायत सरसफाइको महत्त्व, पौष्टिक आहार र व्यायामको महत्त्वसँगै विविध विषयमा विद्यार्थीहरूलाई जानकारी दिइन् ।
महिनावारीबारे खुलेर कुराकानी गर्न प्रोत्साहन गर्नुपर्ने औंल्याउँदै उनले छात्र र छात्राहरू दुवैलाई यस विषयमा विद्यालयले शिक्षित गर्नुपर्ने बताइन् ।
कलेजका प्रिन्सिपल सुशान्त बानियाँले महिनावारीका विषयमा विद्यमान गलत धारणालाई चिर्न र यथार्थपरक जानकारी दिनका लागि विज्ञलाई निम्त्याएको सुनाए ।
यस्ताखाले सिकाइबाट महिनावारीबारे विद्यार्थीहरूमा व्यक्तिगत सिकाइमा वृद्धि हुनेमात्र नभएर शिक्षण सिकाइलाई टेवा पुग्ने सुनाए ।
पठनपाठनका अलाबा विद्यार्थीहरूलाई यस्ता कार्यक्रममा सरिक बनाउँदा उनीहरूको आत्मविश्वासमा बढोत्तरी हुने र छात्राहरूमा व्यवहारिक तयारी पनि हुने उनको धारणा छ ।
प्रभावकारी शिक्षण सिकाइअन्तर्गत केही पृथक कार्यक्रमहरूलाई अगाडि बढाउनेक्रममा स्वास्थ्य सचेतना जगाउने खालको यो कार्यक्रम गरिएको बताउँदै उनले आगामी दिनमा पनि यी र यस्ता ‘कन्सेप्ट’ मा काम गरिरहने प्रतिबद्धता जनाए ।
