विराटनगर । कोशी राजमार्गमा सिटी सफारी चलाउन नदिने प्रशासनको नयाँ नियमको विरोधमा उत्रिएका सफारी चालक र प्रशासनबीच शनिबार मौखिक वार्ता भएको छ ।
आज मध्याह्न जिल्ला प्रशासन कार्यालय मोरङमा भएको वार्तामा विराटनगर महानगरपालिकाभित्रको ६ लेन सडकको छेउबाट मात्र सफारी चलाउन पाइने सहमति भएको छ ।
यसअघि बिहीबारबाट जिल्ला ट्राफिक कार्यालयले आन्तरिक मामिला तथा कानुन मन्त्रालय र महानगरपालिकासँग समन्वय गरेर कोशी राजमार्गमा सफारीलाई निषेध गरेको थियो ।
तर, आफूहरूको रोजीरोटी खोस्ने तरिकाले निर्णय भएको भन्दै आन्दोलनरत सफारी चालकहरूले राजमार्ग नै अवरुद्ध गरेर प्रदर्शन गरेका थिए ।
त्यसपछि चालकको माग सम्बोधन गर्न भनेर प्रमुख जिल्ला अधिकारी प्रेमप्रसाद भट्टराईले उनीहरूलाई शनिबार (आज) का लागि वार्तामा बोलाएका थिए ।
वार्तामा सफारी चालकका अलाबा प्रहरी अधिकारीहरू सामाजिक अभियन्ताद्वय पारुल क्षेत्री र अभिषेक गिरी पनि उपस्थित थिए ।
हरित अभियन्ता क्षेत्री र कोशी सुधार अभियानका संयोजक तथा गिरी फाउन्डेसनका अध्यक्ष अभिषेक सफारी चालकहरूकै आग्रहमा प्रशासन पुगेका थिए ।
उनीहरूबीचमा भएको छलफलपछि ६ लेन सडकको छेउमा सफारी चलाउन पाउने, पार्किङ गरेर बस्न नपाउने, प्रत्येक वर्ष नवीकरण गर्नुपर्ने, चालकले लाइसेन्स, ब्लुबुकलगायतका कागजात दुरुस्त राख्नुपर्ने विषयमा मौखिक सहमति भएको हो ।
साथै, ट्राफिक व्यवस्थापनलाई सहज बनाउन एक साताभित्र सर्वपक्षीय बैठक बस्नेगरी सहमति भएको हो ।
