विराटनगर । मोरङको सुन्दरहरैंचा नगरपालिकामा एकै घरका दुई जना नाबालिका मृत भेटिएका छन् । सुन्दरहरैंचा-७ गोठगाउँमा एकै घरका दुई बालिका मृत अवस्थामा फेला परेका हुन् ।
तीन वर्षकी अर्पणा कार्की र एक वर्षकी आइका कार्कीको शव फेला परेको हो । मृतक नाबालिकाहरू धनकुटा पाख्रिबास ४ डिकुरे घर भई हाल मोरङ सुन्दरहरैंचा ७ मालती टोल बस्ने सिता रेग्मिको घरमा बस्दै आएका ३१ वर्षीय अर्जुन कार्की र अस्मिता पौडेलका छोरी हुन् ।
शनिबार साँझ ५ बजेतिर घाँस काट्न आउनेले केराबारी जंगलमा मृत बालिका फेला पारेका हुन् । प्रहरीका अनुसार अँगालो हालेको अवस्थामा फेला परेका उनीहरूको छेउमा विषादीको बट्टा पनि भेटिएको छ ।
मोरङ प्रहरी प्रमुख प्रहरी उपरीक्षक नवराज कार्कीका अनुसार क्राइम सेन्समा सफाय ५ नम्बरको विषादीको बट्टा फेला परेको छ ।
कार्कीका अनुसार अर्जुन र अस्मिताबीच हिँजो साँझ ६ बजेतिर झगडा भएको थियो । सवारी चालक रहेका अर्जुन बिहानै आफ्नो काममा लागे ।
श्रीमती अस्मिता पनि बिहानको मिर्मिरेमै दुई बालबच्चा च्यापेर पूर्वाञ्चल विश्वविद्यालय तिर लागेको स्थानीय जानकारी दिएका छन् ।
तर, दिउँसो साढे ४ बजेतिर दुई नाबालिकाको शव भेटियो भने आमा अस्मिता भने अझै भेटिएकी छैनन् । आफ्ना दुवै छोरीलाई विष खुवाएर फरार भएको हुनसक्ने प्रहरीले जनाएको छ ।
बालिकाको शव भेटिएको स्थान नारायण न्यौपानेको केरा बगान हो ।
