विराटनगर । इलाका प्रहरी कार्यालय दुहबीका इन्चार्ज प्रहरी निरीक्षक मोहन पोखरेललाई साउन महिनाको उत्कृष्ट प्रहरी घोषित गरेको छ । जिल्ला प्रहरी कार्यालय, सुनसरीले पोखरेललाई यो महिनाको उत्कृष्ट प्रहरी घोषणा गरेको हो ।
सुनसरी प्रहरी प्रमुख प्रहरी उपरीक्षक विपिन रेग्मीका अनुसार विभागाय मूल्य-मान्यता, आदेश-निर्देशनका पालना गरी व्यवसायिक, लगनशील र कर्तव्यनिष्ठ तवरले कर्तव्यपथमा तल्लीन पोखरेल उत्कृष्ट ठहरिएका हुन् ।
पोखरेलको नेतृत्वमा दुहबी नगरपालिकामा एक बालिका अपहरण मुद्दाका तीन अभियुक्तलाई पक्राउ गरिएको थियो ।
गत साउन १५ गते दिउँसो ३ बजेतिर दुहबी-१० डुम्राहाबाट ६ वर्षीया नाबालिका अपहरणमा परेकी थिइन् ।
उनले उक्त प्रकरणमा विराटनगर महानगरपालिका-६ रामपुरका ५० वर्षीय सञ्जय पासवान, कटहरी गाउँपालिका-६ घर भई विराटनगर-१० मा डेरा गरी बस्ने ५० वर्षीय कलानन्द पासवान र उनकै श्रीमती ४० वर्षीय सरिता पासवानलाई पक्राउ गरी कानूनी दायरामा ल्याएका थिए ।
त्यसबाहेक पोखरेलले दुहबी-५ फुटबल चोकबाट ३९ केजी १०० ग्राम गाँजा बरामद गरेर बा ५७ प १२२४ नम्बरको मोटरसाइकल र मोटरसाइकल चालकलाई नियन्त्रणमा लिन सफल भएका थिए ।
यसका साथै, पोखरेलले समुदाय-प्रहरी साझेदारी कार्यक्रमअन्तर्गत ५६३ वटा विभिन्न जनचेतनामूलक कार्यक्रमहरू सञ्चालन गरेका थिए ।
यी सबै उल्लेखनीय कार्यहरूका कारण इन्स्पेक्टर पोखरेललाई साउन महिनाको उत्कृष्ट प्रहरी घोषणा गरिएको एसपी रेग्मीले जानकारी दिए ।
