विराटनगर । मोरङको विराटनगर महानगरपालिकामा तीव्र गतिको स्कुटरको ठक्करबाट साइकलयात्री गम्भीर घाइते भएका छन् ।
सोमबार राति ९:३० बजेतिर विराटनगर-१२ कोशी प्रोजेक्टमा को ३२ प ९९४४ नम्बरको स्कुटरले बाटो काट्दै गरेको साइकललाई ठक्कर दिई दुर्घटना भएको थियो ।
रानीबाट रोडशेषतर्फ आउँदै गरेको स्कुटरले ठक्कर दिँदा साइकलयात्री स्थानीय ४० वर्षीय उमेश यादवको टाउकोमा चोट लागेको छ ।
दुर्घटनामा स्कुटरमा पछाडि सवार विराटनगर-२ मुनालपथ बस्ने २४ वर्षीय निकुराज गिरी पनि घाइते छन् । टाउकोमा चोट लागेका उनको अवस्था सामान्य छ ।
दुवै जनाको न्युरो अस्पताल विराटनगरमा उपचार भइरहेको छ । चालक विराटनगर-५ पृथ्वी चोक बस्ने २३ वर्षीय वीरबल मिस्त्रीलाई वडा प्रहरी कार्यालय, विराटनगरले नियन्त्रणमा लिएको छ ।
स्कुटर तीव्र गतिमा कुदाउँदा दुर्घटना भएको र चालकले सवारी चालक अनुमति पत्र साथमा नबोकेको प्रहरीले जनाएको छ ।
