विराटनगर । सुनसरीको देवानगन्ज गाउँपालिकाले बाँदर नियन्त्रणका लागि अभियान नै थालेको छ ।
दशकयता बाँदरले किसानले लगाएको बालीमा क्षति गर्ने, बाटोमा हिँड्ने सर्वसाधारणलाई दुःख दिन थालेपछि गाउँपालिका स्वयम् बाँदर नियन्त्रणमा जुटेको हो ।
देवानगन्ज गाउँपालिका ३ र ४ कप्तानगन्जका स्थानीय बासिन्दा बाँदरको उपद्रोले आजित छन् ।
गाउँपालिकालले चालू आर्थिक वर्षमा बजेट नै विनियोजन गरेर बाँदर नियन्त्रण अभियान थालेको हो ।
गाउँमा बाँदरले सर्वसाधारणले लगाएको तरकारी तथा फलफूल खाई नष्ट गर्ने, हुलकाहुल बालीमा पसेर कुल्ची दिने, मकैमा क्षति गर्ने दुःख दिन थालेपछि बाध्य भएर अभियान थालिएको गाउँपालिका अध्यक्ष बेचनप्रसाद मेहताले जनाए ।
भारतबाट आउने बाँदरको समूहले देवानगन्ज गाउँपालिकामा आतङ्क मच्चाएको सयौंको गुनासो आएले गाउँपालिकाले नियन्त्रण अभियानमा जुटेको जनाएको छ ।
बाँदरबाट त्रसित र आजित भएका किसानले नियन्त्रणका लागि गाउँपालिकालाई गुहारेपछि बाँदर नियन्त्रणका लागि प्रविधि टोली नै परिचालन गरेको जनाएको छ ।
खेतबारीमा लगाइएको बालीनाली बाँदरले नष्ट गर्नुकासाथै भान्सा कोठा भित्रका खानेकुरा समेत खाने तथा मानिसहरूलाई आक्रमण गर्न थालेपछि स्थानीयवासी बाँदर आतंकबाट त्रसित बनेका थिए ।
देवानगञ्ज गाउँपालिका-४ दक्षिणीबस्ती कप्तानगञ्ज पाचोसिम्बरमा प्रवासी बाँदरहरूले स्थायी रूपमा बस्न थालेपछि स्थानीयवासीलाई सास्ती भएको हो ।
दुई सयको सङ्ख्यामा गाउँ भित्रिएको बाँदरहरूले सागसब्जी, तरकारी र अन्नबाली खाने तथा खेदाउने क्रममा मानिसहरूलाई समेत आक्रमण गरेर घाइते बनाउने गरेको छ ।
आँगनमा सुकाइरहेको लुगाफाटो च्यातिदिने र मानिसहरूलाई चिथोरेर घाइते बनाउने समेत गर्छन् ।
