विराटनगर । मोरङको ग्रामथान गाउँपालिकामा सोमबार भएका दुई सडक दुर्घटनामा तीन जना घाइते भएका छन् ।
सोमबार साँझ ६ बजेतिर ग्रामथान-५ लवारेमा तेतरियाबाट दुहबीतर्फ जाँदै गरेको प्रदेश १-०४-००१ प २२३२ नम्बरको मोटरसाइकल दुर्घटना भएको थियो ।
विपरीत दिशाबाट आँउदै गरेको को १ ख ४१३७ नम्बरको आइचर ट्रकलाई देखेर अनियन्त्रित भई
दुर्घटना हुँदा मोटरसाइकल चालक दुहबी नगरपालिका-७ बस्ने अन्दाजी २० वर्ष सिर्पन माझी घाइते भएका थिए ।
उनीसहित घाइते भएका सोही मोटरसाइकलमा पछाडि सवार अन्दाजी २० वर्षीय अतीत चौधरी घाइतेलाई उपचारको लागि विराट टिचिङ अस्पताल, विराटनगर ल्याइएको छ ।
ट्रक र ट्रक चालक पथरी नगरपालिका-६ का ३९ वर्षीय सुचिन्द्र मण्डल कागजपत्र प्रहरी चौकी तेतरीयामा राखेर भोलि सम्पर्कमा आउनेगरी गन्तब्यतर्फ गएका छन् ।
मोटरसाइकल तीव्र गतिमा कुदाउँदा दुर्घटना भएको प्रहरीको प्रारम्भिक अनुसन्धानमा खुलेको छ ।
यस्तै, हिजो मध्याह्न १२ बजेतिर ग्रामथान-२ झोराहटमा विराटचोकबाट विराटनगरतर्फ आउँदै गरेको बा ५४ प ४६०२ नम्बरको मोटरसाइकलले सोही दिशातर्फ जाँदै गरेको को २७ प १५८३ नम्बरको मोटरसाइकललाई पछाडिबाट ठक्कर दिएको थियो ।
सो दुर्घटनामा १५८३ नम्बरको मोटरसाइकलमा सवार ३२ वर्षीय पुनम श्रेष्ठको टाउकोमा चोट लागेको र उपचारको लागि न्युरो अस्पताल विराटनगर ल्याइएको छ ।
उनका श्रीमान् मोटरसाइकल चालक राकेश तुलाधर, ठक्कर दिने ४६०२ नम्बरको मोटरसाइकल चालक पथरीशनिचरे-४ का अर्जुन राई उपचारमा संलग्न रहेका छन् ।
४६०२ नम्बरको मोटरसाइकल चालकको सडकमा ध्यान केन्द्रित नहुँदा दुर्घटना भएको प्रहरीको आँकलन छ ।
