विराटनगर । मोरङको विराटनगर महानगरपालिकाभित्र बुधबार (हिजो) एकै दिन चारवटा सडक दुर्घटना भएका छन् ।
ती दुर्घटनामा आठ जना घाइते भएको मोरङ प्रहरीले जनाएको छ ।
हिजो बिहान करिब ५:५० बजे विराटनगर-५ पिपल चौकमा बा ०१-०२९ च ३८०२ नं. को कार अनियन्त्रित भई दुर्घटना हुँदा दुईजना महिला घाइते भएका छन् ।
घाइते हुनेमा विराटनगर-१२ की २४ वर्षीया माल्विका तामाङ र २५ वर्षीया तुलसी मगर रहेका छन् । दुवैको न्युरो अस्पताल विराटनगरमा उपचार भइरहेको छ ।
यस्तै, दिउँसो करिब ५:३० बजे विराटनगर-४ मा मोटरसाइकल र सिटि सफारी एक आपसमा ठोक्किँदा तीन जना घाइते भएका छन् ।
घाइतेहरूमा मोटरसाइकल चालक बुढीगंगा गाउँपालिका-२ का २५ वर्षीय मनिष विश्वास, सिटी चालक विराटनगर-४ का ३७ वर्षीय दीपक सुतियार र सोही ठाउँका ४० वर्षीय गणेश शर्मा रहेका छन् ।
त्यसैगरी, साँझ करिब ५:५० बजे विराटनगर-१० मा मोटरसाइकल र सिटि सफारीबीच ठक्कर हुँदा दुईजना घाइते भएका छन् । घाइते हुनेमा मोटरसाइकल चालक सुनसरी देवानगञ्ज-३ का ३८ वर्षीय सहुनाब आलम र मोरङ जहदा-२ का ६८ वर्षीय इस्लाम मियाँ रहेका छन् ।
अपराह्न करिब ४:३० बजे विराटनगर-१४ महतो टोलमा मोटरसाइकलले साइकल यात्रीलाई ठक्कर दिँदा १४ वर्षीया सिमा चौधरी घाइते भएकी छिन् ।
