विराटनगर । विराटनगर महानगरपालिका-१० स्थित कोबास कलेजमा विद्यालय प्रशासन र प्रिन्सिपलबीचको लफडा सतहमा आएको छ ।
कलेजकी सञ्चालक प्रिया सारडाले प्राचार्य सुनील श्रेष्ठलाई कलेजभित्र प्रवेशमा रोक लगाएसँगै कोबासको लफडा सतहमा आएको हो ।
प्रिन्सिपल श्रेष्ठले आफूलाई कलेज सञ्चालक प्रिया सारडाले प्रवेश नदिएको भन्दै सोमबार कलेज प्रवेशद्वार बाहिर पत्रकार सम्मेलन गरेका थिए ।
पत्रकार सम्मेलनमा उनले आफूलाई निस्कासनको पत्र नदिएको, प्रवेश पनि नदिएको बताएका छन् ।
विराटनगरको शैक्षिक क्षेत्रमा सुनील श्रेष्ठ एक चर्चित नाम हो । २०८० माघ पहिलो साता उनी कोबास कलेजको प्रिन्सिपलमा नियुक्त भएका थिए ।
त्यसअघि २०७२ सालदेखि २०७७ सालसम्म कलेजको प्रिन्सिपल भएर आफ्नो जिम्मेवारी सफलतापूर्वक निर्वाह गरेका उनलाई कोबास कलेजको सञ्चालक समितिले पुन: प्रिन्सिपलमा नियुक्त गरेको थियो ।
त्यसबीचमा केवल पोखरेलले प्रिन्सिपलको भूमिका निर्वाह गरेका थिए । उनले राजीनामा दिएपछि फेरि पनि श्रेष्ठ प्रिन्सिपल बनेका थिए ।
तस्बिर: बाबुराम भण्डारी 
