विराटनगर । विराटनगर महानगरपालिका-८ मा अवस्थित ग्रेडेड स्कुलले विद्यालय परिसरमा प्रथम त्रैमासिक परीक्षाको नतिजासँगै चित्रकला, हस्तकला र विज्ञान प्रदर्शनी गरेको छ ।
शनिबार एक कार्यक्रमको आयोजना गरी ग्रेडेडले विद्यार्थीहरूलाई विभिन्न समूहमा विभाजित गर्दै विज्ञानका विभिन्न सामग्रीहरू प्रदर्शनी गरेको हो ।
विद्यार्थीहरूले रोबोटिक कार, हाइड्रोलिक क्रेन र ब्रिज, सूर्य र चन्द्रग्रहण, स्मार्ट सिटी, सेक्युरिटी हाउस, म्याग्नेटिक इन्डक्सन, वाटर फिल्टर, स्वास्थ्यतर्फ मानव शरीरको बनोट, पाचनप्रणाली, मानव मुटु बनाएका थिए ।
त्यसैगरी, हस्तकलातर्फ स्मार्ट सिटी, घरहरू, फूल र विभिन्न घरायसी सजावटका सामग्री बनाएका थिए ।
गत वर्ष विद्यार्थीहरूद्वारा ड्रोन र रिमोट कन्ट्रोल कार बनाएर सफल परीक्षण गरिएको थियो ।
विद्यालयले पढाइसँगै विभिन्न प्रकारका विद्यार्थीहरूको सीप र क्षमताअनुसार विद्यार्थीको सर्वांगीण विकास गर्ने हेतुले यस प्रकारका कार्यक्रम गर्दै आएको विद्यालयका प्रधानाध्यापक प्रेमलाल सिंह सुवालले बताए ।
