विराटनगर । मोरङको विराटनगर महानगरपालिका-१० स्थित कोबास सेकेन्डरी स्कुलले कक्षा ११ मा भर्ना भएका नयाँ विद्यार्थीहरूलाई स्वागत गरेको छ ।
शनिबार विराटनगरको होटल मनास्लु इनमा एक कार्यक्रमको आयोजना गरी कोबास कलेजले नयाँ भर्ना भएका २९औं ब्याचका विद्यार्थीहरूलाई स्वागत गरेको हो ।
कक्षा १२ मा अध्ययनरत विद्यार्थीहरूले ११ का छात्रछात्रालाई नृत्य, नाटक, अतिरिक्त क्रियाकलापमार्फत स्वागत गरेका थिए ।
कार्यक्रममा बोल्दै प्रिन्सिपल सुनीलकुमार श्रेष्ठले कक्षा ११ मा व्यवस्थापन, होटल म्यानेजमेन्ट, विज्ञान र कम्प्युटर साइन्सतर्फ तीन सय ५० विद्यार्थी भर्ना भएको जानकारी दिए ।
प्रवेशिका परीक्षामार्फत् छानिएका उनीहरूको उज्ज्वल भविष्यको कामना गर्दै प्रिन्सिपल श्रेष्ठले कोबासा भूतपूर्व विद्यार्थीहरूजस्तै नयाँ विद्यार्थीहरूलाई सफलतातर्फ अग्रसर बन्ने शुभेच्छा प्रकट गरे ।
उनले भने, ‘आँखा खोलेर हेरेको सपना पूरा हुने हो । पठनपाठनको सिलसिलमा शिक्षकहरूसँग दुखेसो, गुनासो हुन सक्छ । त्यी सब गुनासो, दुखेसो सफलताले मेटाउन सक्छ । मेहनत गर्नाले सपना पूरा हुन्छ । अनुशासन नहुँदा सफलता त के एक असल नागरिक पनि बन्न सकिँदैन । यसैले अनुशासित भई मेहनत गर्नुहोस् ।’
देश तथा विदेशमा व्यवस्थापनतिर दखल राख्ने, प्रभाव राख्ने व्यक्तिहरू कोबासबाट दीक्षित भएका विद्यार्थीहरू भएको उल्लेख गर्दै उनले भने, ‘उहाँहरूको सफलताले कोबासको शीर ठाडो भएको छ । यसैगरी सबैले मेहनत गर्नुपर्छ ।’
कार्यक्रममा बोल्दै कलेजका सञ्चालक सुमन कालिकोटेले विराटनगरलाई देशभरिकै एजुकेसन हबका रूपमा चिनाउन कोबासमात्र नभएर हरेक विद्यालय उत्कृष्ट हुन जरूरी रहेको सुनाए ।
‘विद्यार्थीको सपना साकार गर्न हामी तल्लीन छौं, यसमा विद्यार्थी र शिक्षकमात्र नभएर अभिभावकले पनि साथ दिनुपर्छ । यसरी विद्यालय-विद्यालय मिलेर विराटनगरलाई शैक्षिक हबका रूपमा प्रस्तुत गर्न सक्छौं । कोबास मात्र उत्कृष्ट भएर हुँदैन ।’
कलेजकी व्यवस्थापन समिति अध्यक्ष प्रिया सारडाले अनुशासित भई अध्ययन गर्दै आफ्ना आमा-बुबाको सपना साकार गर्न विद्यार्थीलाई सुझाव दिइन् ।
एनएमबी बैंकका कोशी प्रदेश प्रमुख सन्तोष बुढाथोकीले संगत राम्रो गर्दै प्रविधिको भरसक्दो सदुपयोग गरी अध्ययन गरेमा बजारले चाहेअनुसारको जनशक्ति बन्न सकिने औंल्याए । कोबास कलेज वर्तमानमा मात्र भविष्यमा अनि कोशी प्रदेशमा मात्र नभएर देशकै अब्बल शिक्षालय बनाउन विद्यार्थीको पनि प्रमुख भूमिका हुने उनको भनाइ छ ।
निजी तथा आवसीय विद्यालय अर्गनाइजेसन नेपाल (प्याब्सन) मोरङका अध्यक्ष प्रेम सुवाल, पूर्वअध्यक्ष सावित्री पराजुलीलगायतले मेहनत, लगनशीलताका साथ अगाडि बढ्न भन्दै विद्यार्थीहरूलाई शुभकामना दिएका थिए ।
कार्यक्रममा कलेजका अध्यक्ष, प्रिन्सिपललगातयले विभिन्न बैंकका शाखा प्रमुखसमेत बनिसकेका पूर्वविद्यार्थीहरूलाई सम्ममान पनि गरेका थिए ।
कक्षा १२ का विद्यार्थीहरूले विराटनगरको टच डान्स स्टुडियोमा नृत्य प्रशिक्षण गरी कार्यक्रममा प्रस्तुत गरेर उपस्थित अभिभावक, शिक्षक तथा नवआगन्तुक विद्यार्थीहरूलाई मनोरञ्जन दिलाएका थिए ।
