विराटनगर । मोरङको विराटनगर महानगरपालिका-५ स्थित एभरेष्ट स्कुलमा कक्षा ११ मा भर्ना भएका विद्यार्थीहरूलाई स्वागत गरिएको छ ।
बिहीबार कञ्चनजंघा बैंकेटमा भव्य कार्यक्रमको आयोजना गरी एभरेष्टमा कक्षा १२ मा अध्ययनरत विद्यार्थीहरूले ११ मा भर्ना भएका नयाँ विद्यार्थीलाई स्वागत गरेका हुन् ।
१२ कक्षाका विद्यार्थीहरूले विभिन्न नृत्य, गायन, सायरी वाचनलगायतका कला प्रस्तुत गर्दै ११ का नयाँ विद्यार्थी, उनीहरूका अभिभाक तथा स्कुलका शिक्षक-शिक्षिकालाई मनोरञ्जन गराए ।
कार्यक्रमलाई सम्बोधन गर्दै विद्यालयका प्राचार्य टीकाराम पुरीले हरेक विद्यार्थीले भविष्यका लागि लक्ष्य निर्धारण गर्नुपर्ने बताए ।
लक्ष्यबिनाको जीवन सार्थक नहुने भन्दै उनले पहिला भविष्यमा के बन्ने त्यो लक्ष्य तय गरेर त्यसको प्राप्तिको लागि अनुशासित भई आत्मविश्वासको साथ मेहनत गर्न सुझाव दिए ।
लक्ष्य प्राप्तिको बाटोमा अघि बढ्दा कहिलेकाहीँ चुनौतीसमेत आइपर्ने भन्दै उनले त्यस्ता चुनौतीलाई आत्मविश्वासले सामना गर्नुपर्ने बताए ।
एभरेष्टले स्थापनादेखि नै उत्कृष्ट नतिजा हासिल गर्दै आएको सबैलाई थाह भएकै हो भन्दै प्राचार्य पुरीले भने, हामी संख्यामा धेरै बनाउन हैन सिमित विद्यार्थी लिएर विश्वस्तरीय गुणस्तरको शिक्षा दिन चाहन्छौं । त्यसैले विद्यार्थीको सर्वांगीण विकास होस भनेर भौतिक संरचना पनि त्यसैगरी बनाइएको छ ।’
प्राचार्य पुरीले पछिल्लो समय प्रविधिको प्रयोगको नाममा दुरुपयोग गर्ने क्रमसमेत बढेको भन्दै एभरेष्टका विद्यार्थीले मोबाइल, ल्यापटपलगायतका ग्याजेटको सदुपयोग मात्र गर्ने विश्वास ब्यक्त गरे ।
आइसिटी अहिलेको युगमा अपरिहार्य हो प्राचार्य पुरीले भने, ‘दुरुपयोग गर्ने लत लागे यो लागुऔषध जस्तै हो, यसले विद्यार्थीको भविष्य र अभिभावकको सपनासमेत चकनाचुर बनाउँछ ।’
विद्यालयका अध्यक्ष विनोद ढकालले एसइईपछि भविष्य बनाउन लक्ष्य बनाउने बेला भएको बताए ।
उनले यो बेलालाई अझ भविष्यका लागी जग बलियो बनाउन वर्तमानमा मेहनत गर्ने बेलाका रूपमा बुझ्नुपर्ने बताए ।
उनले एभरेष्टका विद्यार्थी जुनसुकै क्षेत्रमा गएपनि अब्बल हुनुपर्ने आफूहरूको चाहना रहेको बताए ।
कार्यक्रममा नयाँ विद्यार्थीको प्रतिनिधित्व गर्दै कक्षा ११ का छात्र इशल भट्टराईले एभरेष्टको विद्यार्थी हुन पाउँदा खुशी लागेको बताए ।
उनले एभरेष्टको शैक्षिक वातावरण, शिक्षक शिक्षिकाको व्यवहार, भौतिक संरचनालगायतका सबै पक्षले शैक्षिक उन्नयनका लागि उत्प्रेरित गर्ने बताए।
