विराटनगर । मोरङको विराटनगर महानगरपालिका-१० स्थित कान्तिपुर कलेजले कक्षा ११ मा भर्ना भएका विद्यार्थीहरूलाई स्वागत गर्दै अभिमुखीकरण गरेको छ ।
आइतबार सिटी पार्टी प्यालेसमा एक कार्यक्रमको आयोजना गरी कलेजले माध्यमिक शिक्षा परीक्षा (एसइई) पास गरेर कान्तिपुरमा भर्ना लिने विद्यार्थीहरूलाई स्वागत गर्दै अभिमुखीकरण गरेको हो ।
विद्यार्थी, अभिभावक तथा विभिन्न आगन्तुकबीचमा कलेजले १०औं ब्याचका विद्यार्थीहरूलाई सम्मान गर्दै अभिमुखीकरण कार्यक्रम गरेको हो ।
कार्यक्रमका सञ्चालक तथा कान्तिपुर कलेजका सञ्चालक शंकर काफ्लेले यो शैक्षिक सत्रमा कक्षा ११ मा नौ सय २० विद्यार्थी भर्ना भएको जानकारी दिए । उनका अनुसार विज्ञान संकायमा ३५० जना भर्ना भएका छन् भने व्यवस्थापन संकायमा ४२० जना र होटल म्यानेजमेन्टतर्फ १५० छात्र-छात्रा भर्ना भएका छन् ।
अघिल्लो वर्ष कक्षा ११ मा ११ सय जनाले भर्ना लिएका थिए ।
कलेजका निर्देशक विष्णु दाहालले अभिभावक र विद्यार्थीको इच्छा भरोसालाई टुट्न नदिनेगरी कान्तिपुर लागिपरेको सुनाए ।
प्रा.डा. तेजनारायण मण्डलले कान्तिपुर कलेजले समाज र देशलाई खाँचो परेका जनशक्ति उत्पादन गर्नेक्रमलाई निरन्तरता दिइरहेको सुनाए ।
कान्तिपुर कलेज छोटो समयमा ठूलो फट्को मारेको शैक्षिक संस्था भएको उल्लेख गर्दै यो विश्वसनीयता कायमै राख्ने प्रयत्न आफूहरूको रहने बताए ।
प्याब्सन मोरङका अध्यक्ष प्रेमलाल सुवालले विश्वविद्यालयको महत्त्वपूर्ण खुट्किलो मानिने प्रवीणता तहमा उत्कृष्ट नतिजा ल्याउन विद्यार्थीहरूलाई शुभकामना दिए ।
कलेजका निर्देशक डा. जनक अधिकारीले विद्यार्थी र अभिभावकले कान्तिपुर नै रोज्ने सही निर्णय गरेको दाबी गर्दै प्रवीणता तहमा राम्रो नतिजा निकाल्न सकेमा युनिभर्सिटीको ढोका सहज हुने बताए ।
कलेजका प्रिन्सिपल भेषराज नेपालले कमजोर विद्यार्थीलाई शैक्षिक रूपमा अब्बल बनाउनेगरी कान्तिपुर लागिपरेको बताए । पढाइका अलाबा अतिरिक्त क्रियाकलापमा पनि कान्तिपुर सदैव अगाडि रहेको सुनाउँदै प्रिन्सिपल नेपालले विश्वविद्यालयको आधार मानिने ‘प्लस टु’ मा विद्यार्थीहरूले मिहिनेत गरिदिन आग्रह गरे ।
विद्यार्थीको उद्देश्य र अभिभावकको सपनाअनुरूप पठनपाठनको प्रक्रिया अगाडि बढाउने प्रतिबद्धता जनाए ।
प्रमुख अतिथि राष्ट्रिय परीक्षा बोर्डका कोशी प्रदेश प्रमुख जीवन गड्त्यौलाले विभिन्न ३१ वटा विद्यालयबाट सर्वोत्कृष्ट नतिजा ल्याउने ३१ जना विद्यार्थीहरूलाई सम्मान गरे । कार्यक्रमलाई सम्बोधन गर्दै उनले परीक्षाको जिपिएलाई आफ्नो जीवन, समाज र संस्कारसँग जोड्नपर्ने बताए । तथापि, कम जिपिए आएकोमा चिन्तित नभई उज्ज्वल भविष्यका लागि कडा मिहिनेत गर्न आग्रह गरे । विद्यार्थीलाई उनीहरूको चाहना, क्षमता र रुचिका आधारमा पठनपाठन गराउन कलेजले जोड दिनुपर्ने उनको भनाइ छ ।
एसइईमा उदयपुर ‘टपर’ र कान्तिपुरको प्रवेश परीक्षामा सर्वोत्कृष्ट नतिजा ल्याएका छात्र सिर्जित घिमिरेले भरोसाका साथ कान्तिपुरमा भर्ना लिएको सुनाए । कलेजको समग्र नतिजा देखेर ठूलो उद्देश्यका साथ कान्तिपुर रोजेको उनको भनाइ थियो । कक्षा ११ मा भर्ना भएका विद्यार्थीहरू अविषा लिम्बू , प्रियंका चौधरी, परीक्षा दाहाललगायतले कान्तिपुर पठनपाठनमा अब्बल र विद्यार्थीहरूको सपना साकार पार्ने सोचेर कान्तिपुर रोजेको बताए ।
२०७२ सालमा स्थापित कलेजले उत्कृष्ट नतिजा ल्याउने १०० विद्यार्थीहरूलाई पूर्ण छात्रवृत्तिमा अध्ययन गराउने गरेको छ
