विराटनगर । मोरङको विराटनगर महानगरपालिका-१० स्थित शिक्षादीप कलेजले कक्षा ११ मा भर्ना भएका विद्यार्थीलाई स्वागत गर्दै अभिमुखीकरण कार्यक्रम आयोजना गरेको छ ।
बिहीबार कलेजले कक्षा ११ का नयाँ विद्यार्थी, उनीहरूका अभिभावक तथा शिक्षक-शिक्षिकालाई राखेर अभिमुखीकरण कार्यक्रम आयोजना गरेको हो । कार्यक्रममा सहजीकरण गर्दै अभिप्रेरक तथा कार्यक्रमका प्रमुख अतिथि मिलन गैह्रेले शिक्षादीपले नयाँ विद्यार्थीलाई उत्प्रेरित गर्न हरसम्भव कोसिस गरेर अनुभूति आफूले गरेको सुनाए ।
कार्यक्रमलाई सम्बोधन गर्दै कलेजका संस्थापक अध्यक्ष तथा कोशी प्रदेशसभा सदस्य भीम पराजुलीले उज्ज्वल भविष्यको कल्पनासहित शिक्षादीप भर्ना भएका विद्यार्थीहरूलाई शुभकामना दिए ।
विद्यार्थीले आफ्नो मात्र नभएर परिवार, समाज र देशका लागि केही गर्ने अठोटका साथ अगाडि बढ्नुपर्ने उल्लेख गर्दै पराजुलीले विगतका नतिजाले नभई वर्तमानको मेहनतले भविष्यको निर्क्यौल गर्ने बताए । आगामी दुई वर्ष आफ्ना खराब आचरण त्यागेर भविष्यको रेखा कोर्न विद्यार्थीहरूलाई पराजुलीको आग्रह थियो ।
कलेजका प्रिन्सिपल ज्ञानबहादुर खड्काले अबका दुई वर्षमा विद्यार्थीहरूमा आउने चुनौतीको सामना गर्न अभिमुखीकरण कार्यक्रमको आयोजना गरिएको सुनाए । प्रवीणता तह जिन्दगीको टर्निङ प्वाइन्ट भएको उल्लेख गर्दै उनले यो समयको सदुपयोग गर्दै आफ्नो भविष्य उज्ज्वल पारेर आफ्ना अभिभावकको सपना पूरा गरी कलेजको लक्ष्य साकार गर्न शुभकामना दिए ।
कलेजका सहप्राध्यापक ललितकुमार मण्डरलेले शिक्षादीपको कक्षा ११ मा भर्ना भएका विद्यार्थीहरूलाई स्वागत गर्दै उनीहरूको उज्ज्वल भविष्यको शुभकामना व्यक्त गरे ।
विज्ञान संकायका कोर्डिनेटर नवीन रायले शिक्षादीप कलेज रोजेकोमा विद्यार्थी र उनीहरूका अभिभावकलाई धन्यवाद दिए । अनुशासन र गुणस्तरीय शिक्षालाई प्राथमिकतामा राखेर कलेज अगाडि बढिरहेको उनको भनाइ थियो ।
कलेजका चिफ डायरेक्टर रमेशकुमार मण्डलले कलेजको लक्ष्य पूरा गर्न विद्यार्थी, शिक्षक र अभिभावकको महत्त्वपूर्ण भूमिका हुने बताउँदै उक्त लक्ष्य पूर्तिका लागि सबै लागिपर्नुपर्ने उल्लेख गरे ।
कार्यक्रममा हालै शिक्षादीपमा भर्ना भएका विद्यार्थीहरूले अरू कलेजबीच शिक्षादीप रोज्नुको कारणबारे आफ्नो धारणा प्रस्तुत गरेका थिए ।
जसमा ४ जिपिए ल्याएर शिक्षादीप कलेज रोजेकी विराटनगरकी छात्रा सिरिन भट्टराईले शिक्षादीपमा पढ्न पाउनु गर्वको विषय भएको सुनाउँदै यो अवसरको सदुपयोग गर्दै आफ्नो भविष्य उज्ज्वल बनाउनेतर्फ अगाडि बढ्ने सुनाइन् ।
झापा घर भएका विद्यार्थी समीर डोटेलले शिक्षादीपसँग आफूहरूले धेरै आशा-अपेक्षा राखेको बताए ।
शिक्षादीपमा कक्षा ११ को विज्ञान संकायमा ९४५ जना विद्यार्थी भर्ना भएका छन् । नयाँ भर्ना भएका विद्यार्थी १७ औं ब्याजका हुन् ।
कक्षा सुरु हुनुभन्दा अगाडि शिक्षादीप कलेजले प्रत्येक वर्ष नयाँ भर्ना भएका विद्यार्थीहरूलाई अभिमुखीकरण गराउँदै आएको छ ।
