विराटनगर । मोरङको विराटनगर महानगरपालिका-२ बरगाछी चोकस्थित विराट क्षितिज कलेज र काठमाडौंस्थित लिपफ्रग टेक्नोलोजीबीच सम्झौता भएको छ।
कलेजमा अध्ययन गर्ने विद्यार्थीहरूको लागि इन्टर्नसिप र प्लेसमेन्टमा सहयोग पुर्याउने उद्देश्यका साथ विराट क्षितिज कलेज र लिपफ्रग टेक्नोलोजीबीच सम्झौता भएको हो।
सम्झौता पत्रमा विराट क्षितिज कलेज विराटनगरको तर्फबाट अध्यक्ष ज्ञानेन्द्र कार्की र काठमाडौंस्थित लिपफ्रग टेक्नोलोजीको तर्फबाट म्यानेजर किरणकुमार रेग्मीले हस्ताक्षर गरेका छन् ।
नेपालको टप कम्पनीमध्ये एक रहेको लिपफ्रग टेक्नोलोजीमा ५०० जना भन्दाबढी विशेषज्ञ सफ्टवेयर इन्जिनियरहरू कार्यरत रहेका छन्।
यससम्झौता अनुसार, कलेजका सेमेस्टर १ देखि ७ सम्मका विद्यार्थीहरूलाई विशेष आइटी तालिम प्रदान गरिनेछ।
नेपालमात्र नभएर भारत, जापान, कोरिया र इजरायलका आइटी कम्पनीहरूमा पनि इन्टर्नसिप र प्लेसमेन्टको अवसर प्राप्त गर्ने विराट क्षितिज कलेजले जनाएको छ।
कलेजको नयाँ आएको व्यवस्थापकीय टिमले अनुभवी र दक्ष शिक्षकहरू राखेर नयाँ शैक्षिक सत्रबाट बिएससी सिएसआइटी र बिसिए कार्यक्रम सञ्चालन गर्ने भएको छ।
शान्त तथा पठनीय वातावरणमा, सुविधा सम्पन्न भवनमा स्थायित्व दिनेगरी कलेज विराटनगर-२ बरगाछी चोकस्थित नयाँ भवनमा सरेको छ।
उक्त कलेजमा बिएससी सिएसआइटीमा ३६ र बिसिएमा ३५ जना विद्यार्थीको कोटा रहेको छ।
सीमित विद्यार्थी भर्ना गरेर गुणस्तरीय शिक्षासँगै सीपयुक्त दक्ष जनशक्ति प्रदान गर्ने कलेजको दाबी छ।
यस सम्झौताले नेपालको शैक्षिक क्षेत्र र आइटी उद्योगबीचको सहकार्यलाई बलियो बनाउने र देशको डिजिटल अर्थतन्त्रलाई टेवा पुर्याउने अपेक्षा गरिएको छ।
