विराटनगर । मोरङको सुनवर्षी नगरपालिका-६ खिर्किडाँगीमा मंगलबार साँझ भएको मोटरसाइकल दुर्घटनामा एक जनाको मृत्यु भएको छ।
मृत्यु हुनेमा स्थानीय अन्दाजी ५० वर्षीय सुरेन दास रहेको प्रहरीले जनाएको छ ।
प्रहरीका अनुसार, राति करिब ८ बजे झपडतलबाट खिर्किडाँगीतर्फ जाँदै गरेको मोटरसाइकलले पैदल हिँडिरहेका दासलाई ठक्कर दिएको थियो।
दुर्घटनामा गम्भीर घाइते भएका दासलाई प्राथमिक उपचारपछि थप उपचारका लागि कोशी अस्पताल बिराटनगर लैजाँदै गर्दा बाटोमै मृत्यु भएको हो।
तत्काल नम्बर नखुलेको मोटरसाइकल लिएर चालक फरार भएपछि इलाका प्रहरी कार्यालय रंगेलीले खोजतलास थालेको थियो।
राति १२ बजेतिर प्रहरीले सुनवर्षी नगरपालिका-६ सरणपुरका १५ वर्षीय रुपेश दासलाई पक्राउ गरेको थियो। उनले चलाएको को १ प ६३४८ नम्बरको १२५ सिसी क्षमताको मोटरसाइकल पनि प्रहरीको नियन्त्रणमा छ।
दुर्घटनाको कारण खुलेको छैन। तर नाबालक चालकले मोटरसाइकल चलाएको र अँध्यारोमा सडक पार गर्दै गरेका पैदल यात्रीलाई नदेखेको हुन सक्ने प्रहरीको प्रारम्भिक अनुमान छ।
मृतकको शव रंगेली अस्पतालको शवगृहमा राखिएको छ। प्रहरीले घटनाबारे थप अनुसन्धान गरिरहेको जनाएको छ।
