विराटनगर । मोरङको विराटनगर महानगरपालिका-१४ स्थित अरनिको नर्सरीनजिक कोशी लोकमार्गमा एक मोटरसाइकल दुर्घटना भएको छ।
सोमबार राति अन्दाजी ९ बजेतिर भएको दुर्घटनामा एक पैदल यात्री गम्भीर घाइते भएका छन्।
प्रहरीका अनुसार, BR 38 V 3272 नम्बरको १२५ सिसी मोटरसाइकलले बाटो काट्दै गरेका स्थानीय ३० वर्षीय दीपक साहलाई ठक्कर दिएको थियो।
दुर्घटनामा परेका साहको टाउको र खुट्टामा गम्भीर चोट लागेको छ।
मोटरसाइकल चालक, भारतको अररिया जोगबनी ६ का ४९ वर्षीय नुरुजमा अंसारीलाई पनि दाहिने आँखा र घुँडामा सामान्य चोट लागेको छ।
दुवै घाइतेलाई तत्काल बिराटनगरको न्युरो अस्पतालमा उपचारका लागि लगिएको छ।
प्रहरीले मोटरसाइकललाई नियन्त्रणमा लिई इलाका प्रहरी कार्यालय रानीमा राखेको जनाएको छ। दुर्घटनास्थल ट्राफिक प्रहरी पोस्ट रानीबाट करिब ४ किलोमिटर उत्तरमा पर्छ।
प्रारम्भिक अनुसन्धानबाट मोटरसाइकल तीव्र गतिमा चलाइएको देखिएको छ। तर चालक मदिरा सेवन गरेको अवस्थामा नभएको र सवारी चालक अनुमतिपत्र भएको पाइएको छ। थप अनुसन्धान जारी रहेको प्रहरीले जनाएको छ।
