विराटनगर । कोशी प्रदेशको लोकसेवा आयोगको अध्यक्षमा पूर्वसचिव महेन्द्रप्रसाद गुरागाईं नियुक्त भएका छन् ।
आइतबार कोशी प्रदेश प्रमुख परशुराम खापुङले गुरागाईंलाई कोशी प्रदेशको लोकसेवा आयोगको अध्यक्षमा नियुक्त गरेका हुन् ।
प्रदेश प्रमुखको कार्यालयले गुरागाईंलाई काेशी प्रदेश लाेकसेवा आयोगको अध्यक्षमा नियुक्त गरिएको जनाएको हो ।
आजै मुख्यमन्त्री तथा मन्त्रिपरिषदको कार्यलयमा मुख्यमन्त्री हिक्मतकुमार कार्कीको अध्यक्षता बसेको सिफारिस समितिको बैठकले उनलाई नियुक्त गर्न प्रदेश प्रमुख परशुराम खापुङसमक्ष सिफारिस गर्ने निर्णय गरेको थियो ।
लामो समय निजामती सेवामा काम गरेका गुरागाईंसँग लोकसेवा आयोगमा काम गरेको अनुभव छ । उनले दुई वर्षअघि सेवाबाट अवकाश लिएको थिए ।
तेह्रथुमको म्याङ्लुङ पुरानो घर भए पनि उनको परिवार मोरङको मंगलबारेमा बसोबास गर्छन् । सिफारिस समितिमा मुख्यमन्त्री, प्रदेशसभाका सभामुख र विपक्षी दलका नेता रहने कानुनी ब्यवस्था छ ।
प्रदेश लोक सेवा आयोग ऐन २०७६ अनुसार आयोगको अध्यक्ष समयावधि ६ वर्षको हुन्छ । यसअघिका अध्यक्ष उतम भट्टराईले उमेर हदका कारण अवकाश लिएका थिए ।
