विराटनगर । नेपाल शिक्षक महासंघले शिक्षकहरूका लागि एकीकृत शैक्षिक व्यवस्थापन सूचना प्रणाली (आइइएमआइएस) सम्बन्धी तीनदिने सुरु भएको छ ।
बर्जु गाउँपालिकाको सभाहलमा मंगलबार बिहानबाट सुरु भएको तालिम १३ गते बिहीबारसम्म हुने छ ।
तालिमको मुख्य उद्देश्य विद्यालय स्तरमा एकीकृत शैक्षिक व्यवस्थापन सूचना प्रणालीको प्रयोग र कार्यान्वयन बारे शिक्षकहरूलाई प्रशिक्षित गर्नु रहेको छ । यो तालिम वेब आधारित र विद्यालय आधारित सफ्टवेयरमा केन्द्रित हुने छ ।
यो तालिममा सामुदायिक विद्यालयका २७ वटा र संस्थागत विद्यालयको १३ जना गरी जम्मा ४० जनाको सहभागिता रहेको छ ।
‘अधिकार र कर्तव्यका लागि शिक्षक एकता’ भन्ने नाराका साथ आयोजना गरिएको तालिमले शिक्षकहरूको अधिकार र जिम्मेवारीको महत्त्वलाई प्रकाश पार्न खोजेको शिक्षक महासंघ बर्जुका अध्यक्ष विजयकुमार चौधरीले बताए ।
विद्यालयको सम्पूर्ण डाटाहरू तथा विद्यालयको प्रोफाइल, भौतिक अवस्था, विद्यार्थीको विवरण लगायत कुराहरू भर्नका लागि यो वेब बेस तीन दिनको तालिम आयोजना भएको बर्जु गाउँ पालिकाका प्रमुख प्रशासकीय अधिकृत तेजेन्द्र गौतमले बताए ।
शिक्षा क्षेत्रमा बर्जु गाउँपालिका देशकै नमुना गाउँपालिका बन्नुपर्छ भन्ने ध्ययका साथ तालिमको आयोजना भएको पालिकाका शिक्षा शाखा प्रमुख बाबुराम कार्कीले बताए ।
