विराटनगर । कोशी प्रदेश सरकारका भौतिक पूर्वाधार विकास मन्त्री गणेश उप्रेतीले शासकीय स्वरूपका कारण संघीयताको औचित्यमाथि प्रश्न खडा हुन थालेको बताउँदै यसको फेरबदल आवश्यक रहेको बताएका छन् ।
मोरङको धनपालथान गाउँपालिकाको गाउँसभा अधिवेशनका क्रममा बोल्दै मन्त्री उप्रेतीले स्थानीय तहमा जस्तै प्रदेश र संघमा पनि प्रत्यक्ष निर्वाचन प्रणाली आवश्यक रहेको सुनाएका हुन् ।
स्थानीय तहमा परिकल्पना गरिएको प्रत्यक्ष निर्वाचन प्रणालीले गर्दा दीगो सरकार बनेको भए पनि प्रदेश र संघमा त्यो अवस्था नरहेको उनको भनाइ छ ।
स्थानीय सरकार जनताको सबैभन्दा नजिकको सरकार भएका कारण जनअपेक्षाअनुसार काम गर्नुपर्ने बताउँदै उनले जनउत्तरदायी बनाउन जनप्रतिनिधिलाई सुझाए ।
संघीयताको विरोध गरेर कलिलै उमेरमा निमोठ्न खोज्नेहरूलाई स्थानीय तहले परिपक्व बनेर जबाफ दिनसक्ने उनको भनाइ छ ।
गाउँपालिकाको सभाहलमा आयोजित कार्यक्रममा पालिका अध्यक्ष जिवच्छप्रसाद गच्छदार र उपाध्यक्ष नसिमा बानोले आगामी आर्थिक वर्ष २०८१/८२ को नीति तथा कार्यक्रम र बजेट पेश गरेका थिए ।
पालिका उपाध्यक्ष बानोले आगामी आर्थिक वर्षको अनुमानित ६४ करोड ३९ लाख ५५ हजार रुपैयाँको बजेट प्रस्तुत गरिन् ।
पालिकाका प्रमुख प्रशासकीय अधिकृत मनोजकुमार ठाकुरले पालिकाभरिका सम्पूर्ण वर्ग, जाति, क्षेत्रको प्रतिनिधित्व हुनेगरी आगामी आर्थिक वर्षको बजेट बनाइएको बताए ।
कार्यक्रममा कोशी प्रदेशसभा सदस्य गयानन्द मण्डल, गाउँ कार्यपालिका सदस्य, नागरिक अगुवा तथा स्थानीयको उपस्थिति रहेको थियो ।
