विराटनगर । मोरङको ग्रामथान गाउँपालिका-२ झोराहाटस्थित शारदा सेकेन्डरी बोर्डिङ स्कुलले अभिभावकहरूलाई अभिमुखीकरण तथा प्रशिक्षण तालिम दिएको छ ।
शनिबार झोराहाटस्थित गोपीकृष्ण मणिकर्णिका सामुदायिक सेवा केन्द्रको सभाहलमा एक कार्यक्रमको आयोजना गरी स्कुलले अभिभावकलाई अभिमुखीकरण तथा प्रशिक्षण दिएको हो ।
काठमाडौंको डायनामिक करिअर सपोर्ट इन्टरनेसनलका अध्यक्ष तथा कार्यकारी निर्देशक विनोद कार्कीले अभिभावकलाई आफ्ना सन्ततिलाई संस्कार सिकाउनेगरी तालिममा सहजीकरण गरेका थिए ।
तालिमका क्रममा उनले घर-परिवार नै बालबालिकाको पहिलो शिक्षालय भएकाले अभिभावकले आफ्ना सन्ततिको शिक्षामा निखार ल्याउन सक्ने बताए ।
स्कुलका संस्थापक सदस्य ॠषिराज दाहाललेले स्वागत मन्तव्य राख्दै विद्यार्थीको पठनपाठनमा विद्यालयले सघाउ भूमिका बहन गरे पनि अभिभावकले उनीहरूको भविष्य तय गर्नसक्ने सुनाए ।
विद्यार्थीहरूबाट सकारात्मक नतिजाको आशा गर्न बाल मनोविज्ञान बुझेर अभिभावकले कार्य गर्नुपर्ने उनको भनाइ छ ।
यसैगरी, आफ्ना बालबालिकाहरूलाई समयानुसार अब्बल बनाउन लागिपरेका अभिभावकलाई प्रशिक्षण दिइएको विद्यालय व्यवस्थापन समिति अध्यक्ष यादवप्रसाद खतिवडाले जानकारी दिए ।
उनले विद्यार्थीलाई संस्कार घरपरिवारमै सिकाएमा विद्यालयले संस्कारसहितको शिक्षालाई प्राथमिकतामा राख्ने सुनाए ।
शारदाका प्रिन्सिपल सञ्जय मण्डलले पठनपाठनका अलावा अतिरिक्त क्रियाकलापमा जोड दिनेगरेको विद्यालयले यसपालि नमुना कार्यक्रमका रूपमा अभिभावक अभिमुखीकरण तथा प्रशिक्षण गरेको जनाए ।
स्कुल र अभिभावकबीचको सम्बन्ध एक रथको दुई पांग्राजस्तै भएको उल्लेख गर्दै उनले यस्ता कार्यक्रमले त्यो सम्बन्ध अझ दरिलो बनाउन महत्त्वपूर्ण भूमिका निर्वाह गर्ने बताए ।
कार्यक्रम सुरु हुनुअघि शारदामा अध्ययनरत विद्यार्थीहरूले राष्ट्रगान र स्वागत गीत गाएका थिए । कार्यक्रममा चिठ्ठामार्फत अभिभावकलाई विभिन्न पुरस्कार प्रदान गरिएको थियो भने अभिभावकलाई विविध खेल खेलाइएको थियो ।
विद्यालयका संस्थापक सदस्यहरूलाई मायाको चिनो वितरण गरिएको थियो ।
वि.सं २०६३ सालमा स्थापित शारदा ग्रामथानको उत्कृष्ट विद्यालयमध्ये एक हो ।
बालकक्षादेखि कक्षा १० सम्म पठनपाठन गर्दै आएको स्कुलले विद्यार्थीहरूमार्फत उत्कृष्ट नतिजा हासिल गर्दैआएको छ ।
ग्रामथान, कटहरी र विराटनगर-१९ नम्बर वडाका पाँच सय विद्यार्थी स्कुलमा अध्ययनरत रहेको सहायक प्रिन्सिपल उमेश लुइँटेलले बताए ।
