default विराटनगर । मोरङको सुन्दरहरैंचा नगरपालिकामा स्कारपिओको ठक्करबाट एक बालिका गम्भीर घाइते भएकी छन् ।
शुक्रबार साँझ सुन्दरहरैंचा-१ पचाममा स्कारपिओको ठक्करबाट १५ वर्षीया बालिका आयूषा गिरि गम्भीर घाइते बनेकी हुन् ।
घिनाघाट-विराटचोक सडकखण्डमा विराटनगरबाट विराटचोकतर्फ जाँदै गरेको मे १ झ १५६ नम्बरको स्कारपिओले साइकलमा सवार उनलाई ठक्कर दिएको थियो ।
पाँचथर फालेलुङ गाउँपालिकाको स्कारपिओले विपरीत दिशाबाट आउँदै गरेको साइकलयात्रीलाई ठक्कर दिएको थियो ।
जसमा ग्रामथान गाउँपालिका-७ बस्ने सोमबहादुर गिरीको छोरी अन्दाजी १५ वर्षीया आयूषा गिरीको दुकै खुट्टा भाँचिएको थियो ।
उनीसँगै साइकलमा सवार सुन्दरहरैंचा- २ बस्ने भरत पौडेलको छोरी अन्दाजी १५ वर्षीया एरिना पौडेल पनि घाइते भएकी छन् ।
उनको दाँया खुट्टा र निधारमा चोट लागेको छ । तथापि, उनको अवस्था सामान्य छ ।
घाइते दुवैलाई उपचारको लागि न्यूरो अस्पताल विराटनगर ल्याइएको छ । तर, ब्लड अभावका कारण आयूषाको उपचारमा समस्या परेको उनका बुबा सोमबहादुरले बताएका छन् ।
उनलाई बचाउन एबी पोजेटिभ ब्लड आवश्यक परेकोले ९८०३५८६१६० मा सम्पर्क गरी सहयोग गरिदिन उनको अपिल छ ।
दुर्घटनापछि प्रहरीले स्कारपियो र स्कारपियो चालक मकवानपुर मनहरी गाउँपालिका-५ बस्ने २८ वर्षीय जीवन बोगटीलाई नियन्त्रणमा लिएको छ ।
तीव्र गतिमा स्कारपिओ चलाएका कारण दुर्घटना भएको प्रहरीको प्रारम्भिक अनुसन्धानले औंल्याएको छ ।
