विराटनगर । विराटनगर महानगरपालिका-४ दूधफारम नजिक पेट्रोल ट्यांकर र म्याजिक भ्यान एकापसमा ठोक्किएर दुर्घटना भएको छ ।
सोमबार दिउँसो ३ बजेतिर भएको उक्त दुर्घटनामा म्याजिक चालक इटहरी उपमहानगरपालिका-१७ का ३० वर्षीय तिलक साह रहेका छन् ।
दुर्घटनामा गम्भीर घाइते भएका साहको उपचारका क्रममा गोल्डेन अस्पतालमा दिउँसो ४:४५ बजेतिर मृत्यु भएको हो ।
उत्तरबाट दक्षिणतर्फ आउँदै गरेको प्रदेश १-०४-००१ ज ००१४ नम्बरको म्याजिक पश्चिमबाट पूर्वतर्फ आएर दक्षिणतर्फ मोडिँदै गरेको ना ७ ख १८७६ नम्बरको ट्यांकरमा ठोक्किएर दुर्घटना भएको हो ।
सो दुर्घटनामा म्याजिकमा सवार अरू पाँच जना घाइते भएको मोरङ प्रहरीले जनाएको छ ।
घाइते हुनेमा विराटनगर-६ का ३६ वर्षीय शंकरप्रसाद शर्मा, ३५ वर्षीय मुन्नाकुमार दास, सुनसरीको दुहवी नगरपालिका-२ की ४० वर्षीया सविना खातुन, मोरङको रंगेली नगरपालिका-८ का २४ वर्षीय अमित सरदार र खोटाङको दिप्रुङ चुइचुम्मा गाउँपालिका–७ का २२ वर्षीय सजिन मगर घाइते भएका छन्।
उनीहरूको विराटनगरस्थित गोल्डेन अस्पतालमा उपचार भइरहेको प्रहरीले जनाएको छ ।
दुर्घटनापछि तत्काल फरार बनेका ट्यांकर चालक सप्तरीको हनुमाननगर घर भएका ३६ वर्षीय सञ्जय ठाकुरलाई प्रहरीले पक्राउ गरेको छ ।
