विराटनगर । मानगढ खानेपानी आयोजनाको मतदान रद्द गरी पुन: निर्वाचन गराउन माग राख्दै उच्च अदालत, विराटनगरमा रिट निवेदन परेको छ ।
विराटनगरका तीन जना उपभोक्ता यज्ञप्रसाद खतिवडा, टंकप्रसाद खतिवडा र भरत कार्कीले १० जनालाई विपक्षी बनाएर बिहीबार उच्च अदालतमा रिट निवेदन दर्ता गराएका हुन् ।
नयाँ नेतृत्व चयनको लागि भएको मतदान रद्द गरी पुनः निर्वाचन समिति गठन गरेर मात्रै निर्वाचनको प्रक्रिया सुरु गर्न माग राख्दै उनीहरूले रिट निवेदन दर्ता गराएका छन् ।
देशकै नमुना खानेपानी आयोजनाका रूपमा चिनिएको मानगढ खानेपानीको चुनाव गत शनिबार भएको थियो । तर, मतदान भइरहेको बेला साँझपख मतदानस्थलमा भएको विवादले मतदान प्रकिया नै भाँडिएको थियो ।
अध्यक्ष पदका उम्मेदवार रामबहादुर घिमिरे पक्षले धाँधली गर्न खोजेको भन्दै अर्को पक्षले मतदानस्थलमा होहल्ला गरेपछि अन्तिम समयमा मतदान रोकिएको थियो ।
नयाँ नेतृत्वका लागि भएको निर्वाचनमा तीन हजार ३७२ जना मतदाताले निर्वाचन अधिकृतहरूबाट मतपत्र बुझेका छन् ।
मतदान गर्न लाइनमा बसेका केहीले विवादका कारण मतदान गर्न पाएका छैनन् । जसले गर्दा मतपेटिकामा त्योभन्दा कम संख्यामा मात्र मतपत्रहरू रहेको अनुमान गरिएको छ ।
गत शनिबार मतदान गरेका विराट खानेपानी तथा सरसफाइ उपभोक्ता संस्थाका सदस्यहरु मतपरिणाम कुरेर बसेका छन् ।
बिहीबार उच्चमा प्रत्येक मतदाताहरूलाई मतदान प्रक्रियामा सहभागी गराई सोही दिन सम्पन्न हुने छ भनी सूचना प्रकाशित गरी तोकिएको समयभन्दा करिब दुई घण्टा ढिला गरी सुरु गरिएको दुषित निर्वाचन प्रक्रिया रद्ध गरेर पुनः निर्वाचन गरिनुपर्ने भन्दै रिट परेको छ ।
निर्वाचनसम्बन्धी विश्वव्यापी मान्यता, नेपालका प्रचलित कानुनहरू, संस्थाहरूले अवलम्बन गर्ने कार्यविधिहरूसमेतको विपरीत अपूर्ण, अधुरो र वैधताशून्य मतदान कार्य, मुचुल्का, खसेका मतपत्रसमेत अमान्य र बदर गरी, निर्वाचन प्रक्रियाहरू विपक्षीहरूको तर्फबाट भएका निर्णयहरू गैरकानुनी कार्यहरू उत्प्रेषणको आदेशद्वारा बदर गर्न माग गरिएको छ ।
विपक्षीहरूले खसेको मत मात्रलाई आधिकारीक मानी सोही मतपत्र मात्र गणना गर्ने गराउने र सोही मतपत्र मात्रको आधारमा निर्वाचन परिणाम घोषणा गर्ने गराउने प्रवल सम्भावना रहेको कारणले मुद्दाको टुंगो नलागुन्जेलसम्म सुबिधा र सन्तुलनका सिद्धान्तलाई दृष्टिगत गरी जेठ १९ गते भएको मतदानको मतपेटिका नखोल्नू-नखोलाउनू, मतगणना नगर्नू-नगराउनू, मत परिणाम घोषित नगर्नू-नगराउनू, सोही मतपत्रको आधार लिई कुनै पनि उम्मेदवारलाई निर्वाचित घोषित नगर्नू-नगराउनू, पदस्थापनालगायतका काम-कारबाही नगर्नू-नगराउनू, कुनै पनि निर्णय तथा काम कारबाहीहरू नगर्नू-नगराउनू र यथास्थितिमा राखू भनी विपक्षीहरूका अन्तरिम आदेश सामेत जारीको माग गरिएको छ ।
उच्च अदालत विराटनगरले भने उक्त रिट निवेदनमा शुक्रबार (आज) लाई पेसी तोकेको छ ।
यस खानेपानी आयोजनाले मोरङको विराटनगर महानगरपालिका १, ३ र ४ गरी तीनवटा वडा र बुढीगंगा गाउँपालिका १ नम्बर वडामा पानी वितरण गर्दै आएको छ ।
अध्यक्षसहित नौ जना पदाधिकारीका लागि हुने चुनावमा कुल ६ हजार नौ सय ८८ उपभोक्ताले मतदान गर्नुपर्ने थियो ।
एक जना अध्यक्ष, महिला र खुल्लामा एक–एक गरी दुई उपाध्यक्ष, सचिव र कोषाध्यक्षमा एक–एक जना निर्वाचित हुँदा सदस्यका रूपमा पुरुष र महिला दुई–दुई गरी चार जना निर्वाचित हुने व्यवस्था छ ।
आगामी पाँच वर्ष आयोजनाको नेतृत्व हत्याउने लक्ष्यका साथ अध्यक्ष पदका लागि एकै दलमा आस्था राख्ने दुईसहित तीन उम्मेदवार चुनावी मैदानमा होमिएका थिए ।
वर्तमान अध्यक्षसमेत रहेका एमालेका रामबहादुर घिमिरे र एमालेकै लालमणि भट्टराई पनि अध्यक्ष बन्ने ध्याउन्नमा थिए भने नेपाली कांग्रेसकी दुर्गा चापागाईं पनि अध्यक्ष पदका लागि चुनाव लडेकी थिइन् ।
यो पनि : मानगढ खानेपानी आयोजनाको चुनाव, नेतृत्वका लागि ‘हानाथाप’
