विराटनगर : नेपाल घरेलु तथा साना उद्योग महासंघले आफ्नो ३५औं स्थापना दिवस मनाएको छ । बिहीबार विराटनगर-५ सभाहलमा कार्यक्रमको आयोजना महासंघको मोरङ शाखाले स्थापना दिवसको अवसरमा शुभकामना आदानप्रदान गरि मनाएको हो ।
कार्यक्रममा बोल्ने क्रमा महासंघ, मोरङ शाखाका अध्यक्ष चेतननाथ निरौलाले सानासाना उद्यमीको हकहितका लागि स्थापना भएको महासंघ ३५ वर्ष पूरा भएको भन्दै स्थापनामा योगदान पुर्याउने अग्रजलाई धन्यवाद दिए ।
महासंघलाई चाहिने कोसेली घर तथा प्रदर्शनीस्थलका लागि भवन बनाइदिने कोशीका मुख्यमन्त्री हिक्मत कार्कीको आश्वासन पाएको सुनाउँदै उनले विराटनगर-५ का वडाध्यक्ष सन्तोष न्यौपानेसँग जग्गा मिलाउन समन्वय गरिरहेको पनि सुनाए ।
संघप्रति आकर्षण बढेको जनाउँदै अध्यक्ष निरौलाले यो वर्ष ३५ जना आजीवन सदस्यका रूपमा महासंघमा आबद्ध भएको बताए । ठुला संघ-संस्थाका एक्स्पोलाई सार्थकता तुल्याउने काम महासंघले गरिरहेको पनि उनको भनाइ छ ।
प्रदेश सरकारले लघु घरेलु र साना उद्योगको प्रवर्द्धनका लागि कार्यक्रम ल्याउनेगरी महासंघसँग समन्वय गरिरहेको उनले बताए ।
उद्योग, सहकारी तथा कृषि मन्त्रालयका अधिकृत शम्भु साहले नुनदेखि सुनसम्मको उद्योगलाई प्रवर्द्धन गर्नेगरी स्थापना भएको महासंघलाई विशिस्ठिकृत रूममा अगाडि बढाउनुपर्ने बताए ।
वडाध्यक्ष सन्तोष न्यौपानेले कोसेली घर तथा प्रदर्शनीस्थलका लागि जग्गा उपलब्ध गराउने प्रतिबद्धता जनाए । अहिले उक्त परियोजनाका लागि जग्गा खोज्ने काम भइरहेको उनको भनाइ छ ।
उद्योगी अरुणकुमार राठीले विभिन्न प्रकारका उद्योगहरू स्थापना भएर यहाँ आबद्ध भए पनि उत्पादनको बजारीकरण गर्ने विषयमा चुकेको हो कि! भन्ने आफ्नो धारणा सुनाए ।
एफएनसिसिआई कोशी प्रदेश अध्यक्ष अन्जु उपाध्यायले ३५औं वसन्त पार गरेकोमा महासंघलाई शुभकामना दिइन् ।
महासंघका केन्द्रीय उपाध्यक्ष मुकेशकुमार उपाध्यायले प्रविधि हस्तान्तरणका लागि भनेर सरकारसँग बजेट विनियोजनको माग गरेको सुनाए ।
महासंघ महिला समितिकी अध्यक्ष अम्बिका भण्डारीले पछिल्लो समय महासंघप्रति जनविश्वास बढेको सुनाउँदै यहाँ आबद्ध हुनेहरूको संख्या उकालो लागिरहेको बताइन् ।
कार्यक्रममा महासंघका संस्थापक अध्यक्ष लवमणि राजभण्डारी, उद्योगी जुगलकिशोर राठी र उद्योग, कृषि तथा सहकारी मन्त्रालयकी शाखा अधिकृत सुशीला श्रेष्ठलगायतले महासंघलाई शुभकामना दिएका थिए ।
महासंघका सचिव श्यामलाल पौडेल (भवेश) ले सञ्चालन गरेको कार्यक्रममा सहसचिव गणेशकुमार साहलगायत अरू सदस्यहरूको उपस्थिति रहेको थियो ।
सानासाना उद्यमीको हकहितका लागि २०४७ सालमा महासंघको स्थापना भएको थियो, त्यसयता महासंघले प्रत्येक वर्ष स्थापना दिवस मनाउँदै आएको छ ।
