विराटनगर । मोरङको ग्रामथान गाउँपालिकाले आगामी आर्थिक वर्ष २०८१÷८२ को वार्षिक नीति तथा कार्यक्रम सार्वजनिक गरेको छ ।
गाउँपालिकाकी कार्यबाहक अध्यक्ष गुणावतीदेवी थारूले मंगलबार आगामी आर्थिक वर्षको नीति तथा कार्यक्रम प्रस्तुत गरेकी थिइन् ।
सम्भवतः वार्षिक नीति तथा कार्यक्रम बेलैमा सार्वजनिक गर्ने स्थानीय तहमध्ये ग्रामथान पहिलो बनेको छ । गाउँपालिकाको नीति तथा कार्यक्रममा भक्का प्रवर्द्धन गर्नेदेखि जीवन–मरण कार्यक्रमसम्म समावेश गरिएको छ ।
‘ग्रामथानको भक्का, आम्दानी पक्का’ भन्ने नारालाई सार्थक बनाउन प्रत्येक पुस–माघमा भक्का मेलाको आयोजना गरिने नीति तथा कार्यक्रममा उल्लेख गरिएको छ ।
यस्तै, गाउँपालिकाका मुख्य–मुख्य सडकमा आधुनिक बत्तीको जडान गर्ने, सामुदायिक विद्यालयमा २०८२ सालदेखि स्थानीय पाठ्यक्रम लागू गर्न पाठ्यपुस्तक निर्माण गर्ने पालिकाको लक्ष्य छ ।
नीति तथा कार्यक्रम तर्जुमा गर्दा आर्थिक विकास तथा गरिबी निवारणमा प्रत्यक्ष योगदान पुर्याउने, जनताको जीवनस्तर, आम्दानी र रोजगारी बढ्ने, स्थानीय स्रोत–साधन र सीपको अधिकतम प्रयोग गर्ने, महिला , बालबालिका तथा पिछडिएका क्षेत्र र समुदायलाई प्रत्यक्ष लाभ पुग्ने, लैंङ्गिक समानता र सामाजिक समावेशीकरण अभिवृद्धि हुने, दीगो विकास, वातावरणीय संरक्षण तथा सम्वर्द्धन गर्न सघाउ पुर्याउने, भाषिक तथा साँस्कृतिक पक्षको जगेर्ना र सामाजिक सद्भाव तथा एकता अभिवृद्धिमा सघाउ पुर्याउनेलगायतका विषयलाई प्राथमिकता दिइने बताइएको छ ।
